Ռադայի պատգամավորը Յացենյուկին խորհուրդ է տվել ծառայողական Mercedes-ը փոխարինել ավանակով

Աշխարհ 22 Դեկտեմբեր, 2014 13:15

«Պյոտր Պորոշենկոյի դաշինք» խմբակցությունից Գերագույն ռադայի պատգամավոր Սերգեյ Կապլինն Ուկրաինայի վարչապետ Արսենի Յացենյուկին առաջարկել է ծառայողական Mercedes-ը փոխարինել ավանակով, քանի դեռ երկիրը գտնվում է ճգնաժամի մեջ: Պատգամավորին զայրացրել է, որ կառավարության ղեկավարի ծառայական ավտոմեքենայի ամառային դողածածկանը ձմեռայինով են փոխել պետության հաշվին: Միայն մեկ անվի փոխարինումը նստել է 42 հազար գրիվնա (2660 դոլար), տեղեկացնում է «Արմենպրես»-ը:

«Յացենյուկը վերջերս իր Mercedes-ի համար գնել է ձմեռային դողածածկան: Մեկ անվի համար ճարվել է 42 հազար գրիվնա: Դա պարզապես կատարյալ արհամարհանք է ամբողջ երկրի նկատմամբ, որտեղ մարդիկ հնարավորություն չունեն նույնիսկ այդ դողածածկանը փոխելու և երթևեկում են ամառայիններով: Եվ դա՝ պետության միջոցներով»,- ասել է Կապլինը «112 Ուկրաինա» հեռուստաալիքի եթերում: Նա նշել է, որ «դժվարին ժամանակներում անհրաժեշտ է «խնայողությունը պետք է տարածվի բացարձակապես ամեն ինչի ու բոլորի՝ պատգամավորների, դատավորների, դատախազների, օգնականների, նախարարությունների աշխատանքի ապահովման վրա»:

«Ես կարծում եմ՝ դու պետք է երթևեկես ավանակով, քանի դեռ երկիրը գտնվում է այսպիսի ճգնաժամում»,- վրդովմունքով նշել է պատգամավորը:

Դեկտեմբերի 20-ին Ուկրաինայի նախագահ Պյոտր Պորոշենկոն պատմել է, որ Դոնբասի գործողությունն օրական Ուկրաինայի տնտեսության վրա 100 միլիոն գրիվնա (6,3 մլն դոլար) է նստում: «Դա վիթխարի գումար է մեր երկրի համար: Բայց պաշտպանության հարցում մենք չենք տնտեսի»,- ընդգծել է պետության ղեկավարը, հաղորդել է ՏԱՍՍ-ը: