Մարիուպոլում գնացքների երթևեկությունը դադարեցված է երկաթուղային կամրջի պայթեցման հետևանքով

Մարիուպոլում գնացքների երթևեկությունը դադարեցված է Կալչիկ գետով անցնող երկաթուղային կամրջի պայթեցման հետևանքով: Այդ մասին, ինչպես տեղեկացնում է «Արմենպրես»-ը, դեկտեմբերի 23-ին հայտնել է Մարիուպոլի քաղաքային խորհրդի մամուլի ծառայությունը:

Պայթեցումը տեղի է ունեցել դեկտեմբերի 23-ի գիշերը Երևանի ժամանակով ժամը 03:40-ին: «Պայթյունի հետևանքով վնասվել է կամրջի հենարանը: Երկաթուղային կայարանի և ծովային նավահանգստի շրջանում գնացքների երթևեկությունը ժամանակավորապես կասեցված է: Զոհեր չկան»,- ասված է հաղորդագրության մեջ:

Ստեղծվել է իշխանության, դատախազության, իրավական մարմինների ներկայացուցիչներից բաղկացած քաղաքային շտաբ, որը համապատասխան միջոցներ կձեռնարկի «պատահարի հետևանքները վերացնելու և մեղսակից անձանց բացահայտելու համար»:

Մամուլի ծառայությունում նշել են, որ գնացքները ժամանակավորապես ուղևորվում են մինչև Սարտանա կայարան, որտեղից կազմակերպվում է ավտոբուսներով ուղևորների փոխադրումը մինչև Մարիուպոլ:

Ինչպես հայտնել է Դոնեցկի մարզի ներկայացուցիչ Վյաչեսլավ Աբրոսկինը, այդ պատահարը որակվում է որպես ահաբեկչություն: «Այսօր գիշերը կատարվել է Մարիուպոլում իրադրության ապակայունացման հանդուգն փորձ: Ձեռնարկվում են անհրաժեշտ բոլոր միջոցները՝ պարզելու և ձերբակալելու բոլոր այն անձանց, ովքեր մեղսակից են ահաբեկչական այդ գործողության կատարմանը»,- հայտնել է նա և հավելել, որ «առաջիկա օրերին տրանսպորտային հաղորդակցությունը կվերականգնվի», հաղորդել է ՏԱՍՍ-ը: