ՀԱՊԿ-ի երկրների ղեկավարների գագաթնաժողովն ավարտվել է 22 փաստաթղթի ընդունմամբ

ՀԱՊԿ-ի երկրների՝ Ռուսաստանի, Հայաստանի, Բելառուսի, Ղազախստանի, Ղրղզստանի և Տաջիկստանի ղեկավարները դեկտեմբերի 23-ին Կրեմլում կայացած գագաթնաժողովի արդյունքում ընդունել են 22 փաստաթուղթ: Պետությունների ղեկավարները հավանություն են տվել համատեղ հայտարարությանը, 19 որոշումների և երկու արձանագրության, տեղեկացնում է «Արմենպրես»-ը:

«ՀԱՊԿ-ի պետությունների ղեկավարների հայտարարության մեջ մտահոգություն է հայտնվում ահաբեկչության վտանգի աճի, Կենտրոնական Ասիայում ծայրահեղականության տարածման կապակցությամբ, այդ թվում՝ աֆղանական գործոնի հաշվառմամբ, ընդգծվում է Ուկրաինայում խաղաղության վերահաստատման և Լեռնային Ղարաբաղի հիմնախնդրի խաղաղ կարգավորման անհրաժեշտությունը»,-ավելի վաղ նշել է ՌԴ-ի նախագահի օգնական Յուրի Ուշակովը՝ մեկնաբանելով փաստաթղթի պատրաստված նախագիծը:

Մյուս փաստաթղթերի թվում են, մասնավորապես, «առաջադրանքների կատարմանը ՀԱՊԿ-ի օպերատիվ հակազդման հավաքական ուժերի պատրաստության ստուգման մասին ՀԱՊԿ-ի Խորհրդի որոշումը, ՀԱՊԿ-ի հավաքական ավիացիոն ուժերի վերաբերյալ Խորհրդի որոշումը, ՀԱՊԿ-ի անդամ պետությունների հակաթմրանյութային ռազմավարության մասին Խորհրդի որոշումը, արտակարգ իրավիճակների կոլեկտիվ հակազդման թեմայի զարգացման հիմնական ուղղությունների իրականացման միջոցառումների պլանի վերաբերյալ Խորհրդի որոշումը», հաղորդել է ՏԱՍՍ-ը: