Քեմերոնը Սուրբծննդյան ուղերձ է հղել բրիտանական ազգին

Սուրբծննդյան տոների շրջանում անհրաժեշտ է հիշել քրիստոնեական արժեքների մասին, որոնք հորդորում են «ոչ միայն վերցնել, այլև տալ»: Այդ մասին, ինչպես տեղեկացնում է «Արմենպրես»-ը, ասված է Միացյալ Թագավորության կառավարության ղեկավար Դևիդ Քեմերոնի՝ բրիտանական ազգին հղված ավանդական նախատոնական ուղերձում:

Վարչապետը՝ երկրի երեք գլխավոր կուսակցությունների առաջնորդներից միակը, ով իրեն քրիտոնյա է համարում, նախ և առաջ երախտագիտության խոսքով դիմել է զինված ուժերի ծառայողներին: «Մենք հավերժ պարտական ենք ձեզ,- հայտարարել է նա:- Զինվորներից ու սպաներից շատերն այժմ հեռու են իրենց տներից, և այս Սուրբ ծնունդին մենք հիշելու ենք նրանց»:

Բացի այդ, Քեմերոնը բարձր է գնահատել բրիտանացի բժիշկների և սոցիալական ծառայությունների աշխատողների ջանքերը: «Անցնող տարում ձեզ հարկ եղավ զգալի ջանքեր գործադրել թե՛ Աֆրիկայում, թե՛ Մերձավոր Արևելքում, թե՛ այստեղ՝ Միացյալ Թագավորությունում: Ձեր աշխատանքը մերձավորի մասին հոգ տանելու քրիստոնեական առաքինության լավագույն դրսևորումն է»,- նշել է վարչապետը:

Քեմերոնը կոչ է արել բրիտանացիներին՝ տոնի ընթացքում հիշել բոլոր նրանց մասին, ովքեր օգնության կարիք ունեն և այն «ապշեցուցիչ պրոֆեսիոնալներին», ովքեր իրենց «հոգատարությունն ու ուշադրությունն» են դրսևորում մարդկանց նկատմամբ, հաղորդել է ՏԱՍՍ-ը: