Էներգառեսուրսների տարանցման ճանապարհները պետք է անցնեն Թուրքիայով. Դավութօղլու

Թուրքիան պետք է օգտագործի իր աշխարհագրական դիրքն էներգառեսուրսների տարանցումից մաքսիմալ օգուտ ստանալու համար: Այս մասին հայտնել է ՌԻԱ «Նովոստին»`վկայակոչելով երկրի վարչապետ Ահմեթ Դավութօղլուին:

«Թուրքիայի տնտեսությունն աճում է, աճում է էներգառեսուրսների պահանջարկը: Մենք չունենք էներգիայի աղբյուրներ, բայց փոխարենը գտնվում ենք էներգետիկ ճանապարհների խաչմերուկում և կարող ենք շահել էներգառեսուրսների տարանցումից: Այնպես, ինչպես բոլոր ճանապարհները տանում են դեպի Հռոմ, այնպես էլ Թուրքիան պետք է դառնա էներգիայի աղբյուրների մատակարարման բոլոր ճանապարհների անցման վայր»,- հայտարարել է Դավութօղլուն Մակեդոնիայի մայրաքաղաք Սկոպյեում դեսպանների հետ հանդիպմանը:

Այն երկրների թվում, որոնցից Թուրքիան կարող է էներգառեսուրսներ անցկացնել, Դավութօղլուն նշել է Ռուսաստանը, որի հետ հարաբերությունները, նրա խոսքով, այժմ զարգանում են և «ապրում լավագույն ժամանակահատվածը վերջին 500 տարվա ընթացքում»:

«Մեր լավ հարաբերությունները ԵՄ-ի հետ չեն նշանակում Ռուսաստանի հետ վատ հարաբերություններ: Ուկրաինայի ճգնաժամի հետ կապված գազամատակարարման այլ ճանապարհների անհրաժեշտություն է առաջանում  և մենք այժմ քննարկում ենք Ռուսաստանի առաջարկն այս հարցի շուրջ: Թուրքիան, հաշվի առնելով իր աշխարհագրությունը, կարող է ապահովել էներգառեսուրսների մատակարարման ամենահեշտ միջոցն այնտեղ, որտեղ կա դրա անհրաժեշտությունը»,- հավելել է Դավութօղլուն: