Կիևում պատգամավորների ոտքերի տակ ռումբ են նետել

Ուկրաինայի մայրաքաղաքում՝ «Կիև» հյուրանոցի մոտ, պայթյուն է որոտացել: Այս մասին հայտնել է lenta.ru-ն:

Ներքին գործերի նախարարության մայրաքաղաքային վարչության փոխանցմամբ`անհայտ երիտասարդը պայթուցիկ է նետել ժողովրդական պատգամավորների ոտքերի տակ, որոնց թվում է եղել Գերագույն ռադայի նախագահի առաջին տեղակալ Անդրեյ Պարուբին:

Միջադեպը տեղի է ունեցել չորեքշաբթի օրը՝ դեկտեմբերի 24-ին, ժամը 23:20 (Մոսկվայի ժամանակով հինգշաբթի՝ 00:20): Այդ նույն փողոցում է գտնվում Ուկրաինայի խորհրդարանի շենքը:

Պայթյունից հետո հանցագործը փախուստի է դիմել, ոստիկանության աշխատակիցները սկսել են հետապնդումը: Հետապնդման ընթացքում նա իրավապահների ուղղությամբ ևս մեկ ռումբ է նետել: Վիրավորվել է մեկ ոստիկան, նա հոսպիտալացվել է: Այն մասին, թե տուժել են արդյոք պատգամավորները, չի հաղորդվում:

Այժմ անցկացվում են միջոցառումներ հարձակվողի անձը բացահայտելու և նրան կալանավորելու ուղղությամբ: