«Ռուբլու թուլացման ժամանակաշրջանն ավարտված է». ֆիննախ

Ռուսաստանի ֆինանսների նախարար Անտոն Սիլուանովն այն կարծիքին է, որ ռուբլու թուլացման ժամանակաշրջանն ավարտված է, և այժմ ծավալվում է նրա ամրապնդման միտումը, տեղեկացնում է «Արմենպրես»-ը՝ հղում անելով ՌԻԱ «Նովոստիին»:

Անցած շաբաթն սկսվել էր դեֆոլտային 1998 թվականից ի վեր ռուբլու խորը անկմամբ՝ երկու օրվա ընթացքում 17 տոկոսով, իսկ բարձրակետին՝ 40 տոկոսով, դեկտեմբերի 16-ին դոլարի փոխարժեքը հասել էր 80,1 ռուբլու, եվրոյինը՝ 100,74 ռուբլու:

«Այդ ժամանակաշրջանը, մեր կարծիքով, ավարտվել է, և այժմ ռուբլու ամրապնդման միտում է դիտվում»,- հայտարարել է նախարարը՝ ելույթ ունենալով Դաշնության խորհրդում:

Դեկտեմբերի 25-ին Մոսկվայի բորսայի սակարկությունների ընթացքում դոլարի և եվրոյի փոխարժեքներն իջել են համապատասխանաբար 52,5 ռուբլուց և 63 ռուբլուց: Դեկտեմբերի 4-ից ի վեր առաջին անգամ դոլարի փոխարժեքն ընկել է մինչև 52,3 ռուբլի, իսկ եվրոյինը՝ մինչև 63,935 ռուբլի:

Ռուսաստանի Բանկն այսօր առավոտյան հայտարարել է, որ ոչ ինքը, ոչ էլ ֆինանանսների նախարարությունը դեկտեմբերի 23-ին արժութային ինտերվենցիաներ չեն իրականացրել: