Սիեռա Լեոնեում կարանտին է սահմանվել Էբոլա վիրուսին հակազդելու համար

Սիեռա Լեոնեի իշխանությունները երկրի հյուսիսում հինգ օր ժամկետով կարանտին են սահմանել Էբոլա վիրուսի հարուցած հիվանդության համաճարակին հակազդելու համար, տեղեկացնում է «Արմենպրես»-ը:

Առաջիկա հինգ օրվա ընթացքում Սիեռա Լեոնեի հյուսիսում արգելված է բնակավայրերի միջև երթևեկությունը մարդկանց և փոխադրամիջոցների համար, բացի այն բրիգադների աշխատողներից, որոնք զբաղված են Էբոլայի համաճարակի դեմ պայքարի գործողություններում: Բացի դրանից, կարգադրված է փակել բոլոր կրպակներն ու շուկաները:

Ինչպես ճշտել են տեղեկատվության նախարարությունում, սահմանափակիչ միջոցը նաև նպատակամղված է այն բանին, որ «կառավարությանը հնարավորություն ընձեռվի կազմել» հանրապետության տարածքում «վիրուսի տարածման հստակ պատկերը»:

Այս ամսին ավելի վաղ Սիեռա Լեոնեի կառավարությունը հայտարարել է Սուրբ Ծննդի և Ամանորի ցանկացած հրապարակային տոնակատարությունների արգելք՝ վտանգավոր վիրուսի համաճարակի պատճառով:

Մեկնաբանելով իշխանությունների վերջին միջոցառումները՝ Սիեռա Լեոնեի նախագահ Էռնեստ Բայ Քորոման դրանք բացատրել է նրանով, որ երկիրը «գտնվում է զարհուրելի թշնամու դեմ պատերազմի վիճակում»:

Այսօրվա դրությամբ Սիեռա Լեոնեում գրանցված են էբոլա վիրուսով ամենամեծ թվով վարակվածներ՝ շուրջ 9 հազար մարդ, հաղորդել է ՏԱՍՍ-ը: