Էրդողանն ընտրվել է «տարվա գրաքննիչ»

Հակասական և զավեշտալի հայտարարություններով հայտնի Թուրքիայի նախագահ Ռեջեփ Թայիփ Էրդողանին այս տարվա ընթացքում այդպես էլ չհաջողվեց դառնալ «տարվա մարդ», սակայն, Time հանդեսն, այդուհանդերձ, նրան ընտրել է «տարվա գրաքննիչ»: Twitter-ում իր գրաքննության ձեռնարկումներով Էրդողանը տեղ է զբաղեցրել Time-ի ցուցակի առաջին տասնյակում:

Ինչպես հաղորդում է «Արմենպրես»-ը, տարվա ընթացքում սոցիալական մամուլում աղմուկ հանած թեմաների 10 հոդվածանոց' Top 10 hashtags that started a conversation ցուցակում 8-րդ տեղում Time-ը տեղադրել է #TwitterisBlockedinTurkey («Թուրքիայում խոչընդոտվել է Twitter»-ը) վերնագիրը:

Այստեղ նշվում է, որ Թուրքիայի այն ժամանակվա վարչապետ Էրդողանը, ով գրաքննություն էր սահմանել Twitter-ի նկատմամբ, իր և կառավարության նկատմամբ ապօրինությունների վերաբերյալ պնդումներից հետո մարտին հետ կանգնեց Twitter-ը խոչընդոտելու ձեռնարկումներից:

Time-ը մեջբերել է Էրդողանի հետևյալ խոսքը. «Ես դա չեմ արել միջազգային հանրության հակազդեցության տակ: Բոլորը կտեսնեն, թե ինչքան հզոր է Թուրքիայի Հանրապետությունը»:

Time նաև նշել է, որ Twitter-ի նկատմամբ արգելքը վերացրել է այն ժամանակ Թուրքիայի նախագահ Աբդուլլահ Գյուլը, ով նման գրաքննությունն անընդունելի էր համարել: «Արդյունքում, Twitter-ի արգելքը Թուրքիայում վերացվեց այդ երկրի Սահմանադրական դատարանի որոշմամբ, որն այդ մասին ընդունած վճռում նշել է, որ այն «ոտնահարում է արտահայտվելու ազատությունը»,- նշել է Time-ը:

Ըստ թուրքական մամուլի՝ անցնող տարվա ընթացքում Էրդողանը հանդես է եկել հետևյալ հակասական և զավեշտալի հայտարություններով՝ «թուրքերենով գիտություն և փիլիսոփայություն չեք ստեղծի», «տղամարդիկ և կանայք չեն կարող հավասար իրավունքներ ունենալ», «ալկոհոլ խմող յուրաքանչյուրը հարբեցող է», «ծնելիության վերահսկողությունը դավաճանություն է», «աբորտը հանցագործություն է», և ամենածիծաղելին' «Ամերիկան հայտնաբերել է ոչ թե Կոլումբոսը, այլ' թուրքերը»: