Վրաստանի վարչապետը Սահակաշվիլիին հայտարարել է ժողովրդի և երկրի թշնամի

Վրաստանի վարչապետ Իրակլի Ղարիբաշվիլին դեկտեմբերի 26-ի տարեվերջյան ամփոփիչ մամուլի ասուլիսում երկրի նախկին նախագահ Միխեիլ Սահակաշվիլիին անվանել է վրաց ժողովրդի թշնամի, որը, վարչապետի խոսքով, վրացի զինվորականներին կոչ էր անում հրաժարվել իրենց երկրի զինված ուժերից և մեկնել Ուկրաինա, տեղեկացնում է «Արմենպրես» -ը:

«Այն, որ անձամբ նախկին նախագահ Սահակաշվիլին, որը մեղադրվում է բազմաթիվ հանցագործությունների մեջ, և նրա թիմի անդամները վրացի զինվորներին կոչ էին անում (բանակցություններն անցկացվել են նաև անձնական խոսակցությունների ընթացքում) հրաժարվել Վրաստանի քաղաքացիությունից, հրաժարվել Վրաստանի զինված ուժերից և մեկնել Ուկրաինա, որովհետև այնտեղ բարձր աշխատավարձեր կլինեն, դա ուղղակի դավաճանություն է և դավաճանելու կոչ»,-հայտարարել է Ղարիբաշվիլին: Նմանօրինակ կոչերը, ինչպես նշել է Վրաստանի վարչապետը, անթույլատրելի են:

«Սահակաշվիլին մեր երկրի և ժողովրդի թշնամին է… Այն, ինչ անում է նախկին գլխավոր հրամանատարը, խայտառակություն է և դավաճանություն մեր երկրին ու ժողովրդին»,-ընդգծել է Ղարիբաշվիլին:

Նրա խոսքով՝ Սահակաշվիլիի միակ մտահոգությունն այն է, որ «Վրաստանում տեղի ունենա հակամարտություն, անկարգություններ և երկիրը վերստին ներքաշվի Ռուսաստանի հետ զինված դիմակայության մեջ. սա էլ հենց թշնամությունն է»:

Դրա հետ մեկտեղ Ղարիբաշվիլին սադրիչ է համարել լրագրողի հարցը՝ Ռուսաստանի նախագահ Վլադիմիր Պուտինն արդյոք Վրաստանի և Ուկրաինայի թշնամին է, թե ոչ:

«Հայտարարությունն ու փիլիսոփայությունը այն չէ, թե ով ավելի համարձակ կարտահայտվի՝ թշնամի է, թե թշնամի չէ, կվիրավորի, թե չի վիրավորի: Բանն այն է, որ մենք պետք է պատասխանատու լինենք մեր յուրաքանչյուր հայտարարության համար: Ես կառավարության ղեկավար եմ և պետք է այնպիսի հայտարարություններ անեմ, որոնք օգուտ կբերեն, այլ ոչ թե այնպիսիք, որոնք կվնասեն մեր երկրին»,-հավելել է վարչապետը՝ դիմելով լրագրողին, հաղորդել է «Նովոստի Գրուզիա»-ն: