Հինգ մարդ է զոհվել, 160 հազարը՝ տարահանվել Մալայզիայում շարունակվող հեղեղումների հետևանքով

Աշխարհ 28 Դեկտեմբեր, 2014 8:41

10 օր առաջ Մալայզիայի արևելքը պատուհասած հեղեղումների պատճառով վերջին ժամերին իրադրությունը զգալիորեն վատացել է: Ինչպես հաղորդել է ԲԵՌՆԱՄԱ լրատվական գործակալությունը, Քելանթանի նահանգում իրենց տներն շտապ լքած մարդկանց թիվն օրվա ընթացքում աճել է գրեթե 30 հազարով, և այժմ փախստականների ճամբարներում է գտնվում գրեթե 82 հազար մարդ, տեղեկացնում է «Արմենպրես»-ը:

Թրենգանուի նահանգում փրկարարները հայտնաբերել են մի քանի օր առաջ կորած ձկնորսի մարմինը, նրա հետ եղած կինը մինչ օրս համարվում է անհայտ կորած: Երկրորդ օրն է, ինչ շարունակվում են Փահանգի նահանգի բնակավայրերից մեկում կամրջից ընկած 11-ամյա աղջկա որոնումները: Ավելի վաղ հայտարարվել է, որ հեղեղումների հետևանքով զոհվել է չորս մարդ: Ընդհանուր առմամբ արդեն ավելի քան 160 հազար մալայզիացիներ լքել են իրենց տները:

Երկրի վարչապետ Նաջիբ Թուն Ռազակը ժամանել է առավել տուժած Քելանթանի նահանգ, որտեղ ղեկավարում է տեղի բնակչության տարահանման գործողությունը: Դրա հետ մեկտեղ աշխատանքները խիստ դժվարանում են, քանի որ շատ գետերում ջրի մակարդակը մի քանի մետրով գերազանցում է առավելագույն թույլատրելի նորմաները:

Բացի դրանից, օդային հաղորդակցությունը գործնականում ընդհատված է անբարենպաստ եղանակային պայմանների պատճառով: Շատ նահանգներում դադարեցված է էլեկտրաէներգիայի մատակարարումը:

Միաժամանակ օդերևութաբանները կանխատեսում են եղանակի հետագա վատացում, հատկապես երկրի արևելքում, որտեղ դեկտեմբերի 28-ին սպասվում է տեղումների ուժեղացում: Այս հեղեղումներն իշխանություններն արդեն համարել են խոշորագույնը վերջին տասը տարվա ընթացքում, հաղորդել է ՏԱՍՍ-ը: