Լուսաբացին վերսկսվել են AirAsia ավիաընկերության օդանավի որոնումները

Լուսաբացին վերսկսվել են AirAsia QZ8501 օդանավի որոնումները, տեղեկացնում է «Արմենպրես»-ը՝ հղում անելով BBC-ին:

AirAsia ընկերության A320-200 աերոբուսը ցամաքային ծառայությունների ռադարներից անհետացել է դեկտեմբերի 28-ի առավոտյան ժամը 6:24-ին՝ Սուրաբայ քաղաքի օդանավակայանից մեկնելուց 42 րոպե անց:

Թեև գիշերվա ընթացքում մի քանի նավ շարունակում էին որոնումները, լայնամասշտաբ գործողությունն սկսվել է միայն արևածագից հետո: Որոնումներին մասնակցում է մի քանի երկիր:

Ինդոնեզիայի փոխնախագահ Յուսուֆ Կալան այն կարծիքին է, որ ինքնաթիռը, ամենայն հավանականությամբ, կործանվել է: Ընդսմին նա ճշտել է, որ Ինդոնեզիայի իշխանություններն առայժմ որևէ տեղեկատվություն չունեն ինքնաթիռի աղետի շրջանի վերաբերյալ:

AirAsia ընկերության սեփականատեր Թոնի Ֆեռնանդեսը հայտարարել է, որ ցնցված է ինքնաթիռի անհետանալուց, որը Ինդոնեզիայից 162 ուղևորներով ու անձնակազմի անդամներով չվերթ էր կատարում դեպի Սինգապուր:

«Մենք չգիտենք՝ կործանվել է արդյոք ինքնաթիռը: Եկեք պարզապես սպասենք և տեսնենք: Մենք չենք ցանկանում ենթադրություններ անել»,- ավիաընկերության ղեկավարի խոսքը մեջբերել է Astro Awani գործակալությունը:

Ինդոնեզիայի Սուրաբայ քաղաքից QZ8501 համարի ներքո դեպի Սինգապուր չվերթ իրականացնող օդանավը Ջակարտայի ցամաքային ծառայությունների հետ կապը կորցրել է տեղական ժամանակով ժամը 07:24-ին: Ինքնաթիռի ուղևորների և անձնակազմի թվում Ինդոնեզիայի 157 քաղաքացի է, Հարավային Կորեայի՝ 3, Մալայզիայի՝ մեկ, և Սիգապուրի մեկ քաղաքացի:

AirAsia-ն բյուջետային մալայզիական ավիաընկերություն է: QZ8501 չվերթը կատարվում էր նրա ինդոնեզական մասնաճյուղի՝ AirAsia Indonesia-ի կողմից:

Անհետանալուց առաջ ինքնաթիռի անձնակազմը, որը թռչում էր մոտավորապես 10 հազար 500 մետր բարձրության վրա, դիսպետչերներին խնդրել է թույլատրել բարձրանալ ևս 2 կիլոմետր՝ դուրս գալու թանձր ամպամածությունից, ինդոնեզական ԶԼՄ-ներին հայտնել է Ինդոնեզիայի տրանսպորտի նախարարության ներկայացուցիչ Հադի Մուստոֆան:

Կապը կորցնելու պահին օդանավը հաղթահարել էր ճանապարհի մոտ կեսը և գտնվում էր Ճավա ու Կալիմանտան կղզիների միջև: Այդ շրջանում բնական լուրջ անոմալիաներ չեն եղել:

Ինդոնեզիայի պաշտոնատարների տեղեկատվության համաձայն՝ ինքնաթիռն աղետի ոչ մի ազդանշան չի տվել: Օդանավը պետք է Սինգապուր ժամաներ ժամը 08:30-ին:

Ավիաընկերության ներկայացուցիչների տեղեկությունների համաձայն՝ ինքնաթիռում եղել է 155 ուղևոր, այդ թվում՝ 17 երեխա: Բացի այդ, օդանավում եղել է երկու օդաչու, բորտ-ինժեները է չորս բորտուղեկցորդ:

AirAsia-ն, որն ստեղծվել է 1994 թվականին, մինչ այժմ ոչ մի օդանավ չի կորցրել և աշխարհի ամենաարդյունավետ և բուռն զարգացող լոուկոստերներից մեկն է: