Աֆղանստանում պաշտոնապես ավարտվել է ՆԱՏՕ-ի ռազմական առաքելությունը

ՆԱՏՕ-ն պաշտոնապես ավարտել է 13-ամյա ռազմական առաքելությունն Աֆղանստանում: Այժմ երկրում դաշինքի գործունեությունը թևակոխում է նոր փուլ: Հյուսիսատլանտյան դաշինքը միայն ուսուցանելու և խորհրդատվություն է տրամադրելու աֆղանցի զինվորականներին, տեղեկացնում է «Արմենպրես»-ը՝ հղում անելով BBC-ին:

Դեկտեմբերի 28-ին Քաբուլում միավորված զորախմբի կենտրոնակայանի վրա իջեցվել է ՆԱՏՕ-ի և առաքելության մասնակից երկրների դրոշը և բարձրացվել է նոր առաքելության դրոշը, որն ստացել է «Վճռական աջակցություն» անվանումը:

Արարողության ընթացքում առաքելության ղեկավար գեներալ Ջոն Քեմփբելը հայտարարել է. «Մենք աֆղան ժողովրդին դուրս բերեցինք խավարից ու վախից և ապագայի հույս տվեցինք նրան»:

Թալիբների ռեժիմի տապալման և «Ալ Քաիդա»-ի վարժական բազաների վերացման ՆԱՏՕ-ի գործողությունն սկսվել էր 2001 թվականի սեպտեմբերի 11-ի ահաբեկչական գործողություններից հետո և շարունակվել 13 տարի:

Հունվարի 1-ից ՆԱՏՕ-ն ռազմական գործողություններից կանցնի Աֆղանստանի պաշտպանության և անվտանգության ազգային ուժերի ուսուցմանը:

ԱՄՆ-ի նախագահ Բարաք Օբաման Սպիտակ տանը հայտարարել է, որ «ԱՄՆ-ի պատմության մեջ ամենաերկարատև պատերազմը» մոտեցել է տրամաբանական ավարտին: Այդուամենայնիվ, ԱՄՆ-ի և Աֆղանստանի իշխանությունների միջև ստորագրված համաձայնագրի պայմաններով՝ ամերիկացիները պահպանել են անհրաժեշտության դեպքում երկրի տարածքում իսլամական արմատականների դեմ ինքնուրույն գործելու իրավունքը: Արևմտյան մնացած պետություններն այսուհետև կարող են միայն ուսուցանել տեղի զինվորականներին:

Աֆղանստանում օտարերկրյա զորակազմերի ընդհանուր թվաքանակը ավելի քան 130 հազարից կրճատվում է մինչև մոտավորապես 12 հազար:

ՆԱՏՕ-ի գլխավոր քարտուղար Ենս Ստոլտենբերգն իր հայտարարության մեջ նշել է. «Այժմ Աֆղանստանի անվտանգությունն ամբողջությամբ գտնվում է երկրի 350 հազար զինվորականների ու ոստիկանների ձեռքում: Սակայն ՆԱՏՕ-ի երկրները և նրա գործընկերները մնում են երկրում, որպեսզի խորհրդատվություն տրամադրեն նրանց և աջակցություն ցուցաբերեն»:

Ընթացիկ տարին ամենաարյունալին է դարձել Աֆղանստանում 2001 թվականից ի վեր. թալիբների դեմ պայքարում զոհվել են առնվազն 4600 աֆղանցի զինվորականներ:

Աֆղանստանում ՆԱՏՕ-ի առաքելության ընթացքում այդ երկրում զոհվել է գրեթե 3500 օտարերկրյա զինվորական: