Մալայզիայի բոլոր դպրոցներում պարապմունքները չեղյալ են հայտարարվել սաստիկ ջրհեղեղի պատճառով

Մալայզիայի իշխանությունները դեկտեմբերի 29-ին հայտարարել են երկրի ամբողջ տարածքում դպրոցական պարապմունքները չեղյալ հայտարարելու մասին՝ կապված վերջին տասնամյակներում երկիրը պատուհասած ամենաընդգրկուն հեղեղումների հետ: Ինչպես տեղեկացնում է «Արմենպրես»-ը, հղում անելով ԲԵՌՆԱՄԱ ազգային լրատվական գործակալությանը, ուսումնական հաստատությունները կարող են աշխատանքը վերսկսել միայն մեկ շաբաթից:

«Այս միջոցն անխուսափելի է, քանի որ շատ դպրոցներ օգտագործվում են որպես հեղեղումներից տուժածների տեղավորման կենտրոններ»,- ասել է Մալայզիայի փոխվարչապետ Մուհիդին Յասինը: Նրա խոսքով՝ երկրում մոլեգնող տարերային աղետը թույլ չի տալիս ակնկալել առաջիկայում ուսումնական հաստատությունների բնականոն աշխատանքը: «Ուսուցիչներին, ծնողներին և դպրոցականներին, որոնք տուժել են հեղեղումներից, ժամանակ է անհրաժեշտ պարապմունքներին պատշաճ պատրաստվելու համար»,-հավելել է Մուհիդինը, որը միաժամանակ զբաղեցնում է կրթության նախարարի պաշտոնը:

Մալայզիայում նոր ուսումնական տարին պետք է սկսվեր հունվարի 4-ին՝ վեցշաբաթյա ձմեռային արձակուրդից հետո, սակայն երկրում տիրող արտակարգ իրադրությունն իշխանություններին ստիպել է փոխել պլանները: Սաստիկ հեղեղումների հետևանքով իրենց տները հարկադրաբար լքել են ավելի քան 225 հազար բնակիչներ երկրի վեց նահանգներում, տասը մարդ զոհված է համարվում: Ամբողջ արևելյան ծովափը կտրված է պետության մնացած տարածքից:

Հեղեղումները, որոնք շարունակվում են արդեն գրեթե երկու շաբաթ, առաջացել են տեղատարափ անձրևներից: Չնայած այն բանին, որ այս տարեշրջանը Հարավարևելյան Ասիայի երկրներում համարվում է անձրևների սեզոն, Մալայզիայում տեղումների ինտենսիվությունը, ըստ փորձագետների գնահատումների, հասել է ռեկորդային մակարդակի: Մալայզիայի կառավարությունը լրացուցիչ 500 մլն ռինգիտ (մոտավորապես 143 մլն դոլար) է հատկացրել հեղեղումներից տուժածներին: Այդ մասին հայտնել է երկրի վարչապետ Նաջիբ Թուն Ռազաքը, որն այցելել էր առավել տուժած նահանգներից մեկը՝ Քելանթան, հաղորդել է ՏԱՍՍ-ը: