Եվս մեկ մզկիթ են հրկիզել Շվեդիայի հարավում

Դեկտեմբերի լույս 29-ի գիշերը մզկիթ է հրկիզվել Շվեդիայի հարավի Էսլյով քաղաքում: Միջադեպի վայր ժամանակ փրկարարներն արձանագրել են, որ բռնկման օջախները եղել են ինչպես շենքի ներսում, այնպես էլ դրանից դուրս, տեղեկացնում է «Արմենպրես»-ը:

Հրշեջները կարողացել են արագորեն մարել կրակը: Տուժածներ չկան:

«Մենք շրջապատել ենք պատահարի վայրը, միջադեպը որակված է որպես հրկիզում»,-հայտնել է Սկոնե նահանգի ոստիկանության ներկայացուցիչ Մարի Կեյսմարը:

Այս արտակարգ պատահարն արդեն 14-րդն է դարձել անցնող տարում: Այսպես, հունվարին Ստոկհոլմի Սյոդերմալմ շրջանի մզկիթի դռներին սվաստիկա էր նկարվել: Մայիսին երեկոյան աղոթքից առաջ Էսկիլստունա քաղաքի մզկիթի մուտքը փակել էին գերաններով ու բետոնե բլոկներով:

Հուլիսին Նորչյոպինգ քաղաքում անհայտ անձինք հրկիզել էին բարաքը նոր մզկիթի կառուցման հրապարակում: Սեպտեմբերին Սյոդերտելյե քաղաքում վանդալները ջարդել էին սոմալիական համայնքի աղոթատան ապակիները, իսկ Ակվեստա վայրում՝ հրկիզել մզկիթի գորգերը:

Հոկտեմբերին Հելսինբորգում հարձակման էր ենթարկվել տեղի մզկիթը, հոկտեմբերին և նոյեմբերին Ֆլենում և Էսլյովում ջարդել էին մզկիթների ապակիները: Նույնը Էսլյովում կրկնվել է այս ամսին: Նոյեմբերին հրկիզիչ խառնուրդով շիշ Էր նետվել Էրեբրայի մզկիթ: Դեկտեմբերի 25-ին Էսկիլստունում մզկիթի հրկիզման հետևանքով հինգ մարդ էր տուժել, հաղորդել է ՏԱՍՍ-ը: