Կարևոր մանրամասներ են բացահայտվել Վրաստանի վարչապետ Ժվանիայի զոհվելուն առնչվող գործում

Կարևոր մանրամասներ են բացահայտվել 2005 թվականին Վրաստանի վարչապետ Զուրաբ Ժվանիայի զոհվելու հանգամանքների նոր հետաքննության ընթացքում: Այդ մասին, ինչպես տեղեկացնում է «Արմենպրես»-ը, երկրի գլխավոր դատախազ Գեորգի Բադաշվիլին հայտարարել է «Կվիրիս պալիտրա» («Շաբաթվա ներկապնակ») թերթին տված հարցազրույցում:

Վրաստանի վարչապետ Զուրաբ Ժվանիան, որը «վարդերի հեղափոխության» առաջնորդներից մեկն էր, 2005 թվականի լույս փետրվարի 3-ի գիշերը Քվեմո Քարթլիի տարածաշրջանի փոխնահանգապետ Ռաուլ Յուսուպովի հետ միասին մեռած է հայտնաբերվել Թբիլիսիի գաղտնի բնակարանում: Այն ժամանակ հայտարարվեց, որ Ժվանիայի և Յուսուպովի ողբերգական մահվան պատճառ է դարձել դժբախտ պատահարը՝ թունավորումը ջեռուցիչ սարքի շմոլ գազից:

«Նախկին վարչապետի զոհվելուն առնչվող գործի հետաքննությունը բազմաթիվ կարևոր մանրամասներ է բացահայտել, որոնց մասին ես չեմ կարող խոսել: Հետաքննության ընթացքին տեղեկացված են Զուրաբ Ժվանիայի և Ռաուլ Յուսուպովի ընտանիքները: Նրանք ներգրավված են հետաքննության գործընթացում»,-դեկտեմբերի 29-ին թերթը մեջբերել է Բադաշվիլիի խոսքը:

2012 թվականին «Վրացական երազանք» կոալիցիայի իշխանության գալուց հետո սկսվել է Ժվանիայի մահվան հանգամանքների նոր հետաքննություն: Ներկայում Վրաստանի դատախազությունը նախկին վարչապետի և Յուսուպովի զոհվելու հանգամանքների հետաքննության շրջանակներում սպասում է փորձաքննության այն նմուշների եզրակացությանը, որոնք փորձագետները վերցրել են մահվանից անմիջապես հետո և 2013 թվականին փորձաքննության ուղարկվել արտասահման, հաղորդել է «Նովոստի Գրուզիա»-ն: