Ֆրանցիսկոս պապն ուղերձ է հղել Խաղաղության համաշխարհային օրվա առթիվ

«Ոչ թե ստրուկներ, այլ երբայրներ». այս թեման է ընտրել Ֆրանցիսկոս պապը Խաղաղության 48-րդ համաշխարհային օրվա համար, որը կնշվի 2015 թվականի հունվարի 1-ին, տեղեկացնում է «Արմենպրես»-ը: «Արդարություն և խաղաղություն» Պապական խորհուրդն այսպես է մեկնաբանել այդ թեման.

«Հաճախ կարծում են, թե ստրկությունը վերաբերում է անցած ժամանակներին: Սակայն այս սոցիալական չարիքը կա նաև արդի աշխարհում: 2014 թվականի հունվարի 1-ի ուղերձը նվիրված էր եղբայրության թեմային. «Եղբայրությունը խաղաղության հիմքն է և դեպի խաղաղություն տանող ուղին»: Դառնալով Աստծու որդիներ՝ բոլոր մարդիկ դառնում են եղբայրներ և քույրեր, որոնք ունեն հավասար արժանապատվություն: Ստրկությունը մահացու վիրավորում է այդ տիեզերական եղբայրությունը, ուստիև ոչնչացնում է խաղաղությունը: Իսկ խաղաղությունը հաստատվում է, երբ մարդը մյուսի մեջ ճանաչում է իր եղբորը, որն ունի նույնպիսի արժանապատվություն»,- հայտարարությունից մեջբերում է արել Վատիկանի ռադիոն:

Խաղաղության համաշխարհային օրը սահմանել է Պողոս VI-ը, և այն ամեն տարի նշվում է հունվարի 1-ին: Հռոմի պապի ուղերձն ուղարկվել է ամբողջ աշխարհի պետական դիվանատներ. այն նաև իրենով նշանավորում է Սուրբ Աթոռի՝ եկող տարվա դվանագիտական գիծը,- նշված է «Արդարություն և խաղաղություն» Պապական խորհրդի հայտարարության մեջ, հաղորդել է ՏԱՍՍ-ը: