ԱՄՆ-ում Ադրբեջանի հետ կապված ևս մեկ քննադատական լսում կանցկացվի

Ադրբեջանի իշխանության հակաժողովրդավարական քայլերի աճի հետ ուժեղանում են նաև միջազգային հանրության ճնշումները: Վերջին օրերին Ադրբեջանում հայտնի դեմքերի կեղծ մեղադրանքներով ձերբակալությունը, ոչ կառավարական կազմակերպությունների դեմ սկսված արշավը, ինչպես նաև «Ազատություն» ռադիոկայանի Բաքվի գրասենյակի փակումն ավելի են խստացրել այդ վերաբերմունքը:

Ինչպես հաղորդում է «Արմենպրես»-ը, «Ազադլըգ» թերթը հայտնում է, որ Վաշինգտոնում հունվարի 12-ին Ադրբեջանում ստեղծված իրավիճակի հետ կապված ևս մեկ քննադատական լսում կանցկացվի: Փորձ կարվի ցույց տալ ստեղծված իրավիճակից Ադրբեջանի դուրս գալու կոնկրետ ճանապարհները:

Ադրբեջանում ստեղծված իրավիճակի հետ կապված ավելի վաղ խիստ հայտարարություններով հանդես էին եկել Եվրոպայի խորհրդարանը, Եվրոպայի Խորհրդի նախագահը: Մի շարք ճանաչված քաղաքական գործիչներ Ադրբեջանի դեմ պատժամիջոցներ կիրառելու առաջարկություն էին արել:

Ադրբեջանում ազատությունների դեմ բռնաճնշումների հարցը 2015 թվականի հունվարի 12-ին Վաշինգտոնում քննարկման կդնի ԱՄՆ-ի Դեմոկրատիային ազգային աջակցության հիմնադրամը: Միջոցառմանը ելույթներով հանդես կգան Մասաչուսեթսի համալսարանի պրոֆեսոր Օդրի Ալշդատը, քաղաքական վերլուծաբան Քեթրին Կոզմանը, Դեմոկրատիային ազգային աջակցություն հիմնադրամի ներկայացուցիչ Միրիամ Լանսկոյը, ԱՄՆ-ի պետքարտուղարի ժողովրդավարության, մարդու իրավունքների և աշխատանքի հարցերով օգնականի տեղակալ Թոմաս Մելիան և ադրբեջանցի պատմաբան Ալթայ Գոյուշովը:

Որոշ փորձագետներ գտնում են, որ մոտ օրերին, հնարավոր է, իրականանան Ադրբեջանի դեմ պատժամիջոցները, քանի որ Ադրբեջանի իշխանությունը չի ցանկանում հետքայլ կատարել, շարունակում է քաղաքացիների դեմ բռնաճնշումները և ոտնահարում միջազգային իրավունքի բոլոր նորմերը:

Փորձագետների կարծիքով, ԱՄՆ-ում Ադրբեջանի հետ կապված հաճախակի դարձած լսումների անցկացումը կողմերի միջև բոլոր կամուրջներն այրվելու ցուցանիշ է հանդիսանում: Ըստ փորձագետների' Ադրբեջանի իշխանությունն աշխարհին, այդ թվում նաև ԱՄՆ-ին մարտահրավեր է նետել և այլ ելք չի թողել, քան ԱՄՆ կողմից համարժեք կերպով արձագանքելը: