Ուրուգվայի ԱԳ նախարարը կոչ է արել ճանաչել ԼՂ անկախությունը

Ուրուգվայի արտաքին գործերի նախարար Լուիս Ալմագրոն կոչ է արել միջազգային մակարդակով ճանաչել ԼՂ անկախությունը՝ հենվելով ազգերի ինքնորոշման սկզբունքի վրա: Ինչպես հաղորդում է «Արմենպրես»-ը՝ վկայակոչելով «Ասբարեզ» պարբերականը, նման հայտարարություն ԱԳ նախարարն արել է հունվարի 4-ին տեղի հայ համայնքի ներկայացուցիչների հետ հանդիպումից հետո: Հանդիպմանը մասնակցել են ՀՅԴ Հայ դատի Ուրուգվայի հանձնախմբի անդամները՝ քննարկելու իրավիճակը Հարավային Կովկասում և Ադրբեջանի կողմից հրադադարի ռեժիմի շարունակական խախտումները, որոնք արժանացել են նախարարի խիստ քննադատությանը:

Հանդիպմանը Ալմագրոն ընդգծել է ԼՂ հակամարտության կարգավորման անհրաժեշտությունը խաղաղ բանակցությունների հիման վրա՝ հաշվի առնելով հայ ժողովրդի ինքնորոշման իրավունքը:

«2011թ. սեպտեմբերին Ուրուգվայի ԱԳ նախարարը հայտարարեց, որ Ուրուգվայը սկսել է լուրջ վերլուծություն կատարել Լեռնային Ղարաբաղի շուրջ, որպեսզի պետական որոշում ընդունի այդ հարցի առնչությամբ»,- հանդիպմանն ասել է Ուրուգվայի Հայ դատի հանձնախմբի անդամները՝ հավելելով, որ այդ օրվանից անցկացվել են հանդիպումներ և Ուորգւվայի պետական բարձրաստիճան դեմքերը հարցի առնչությամբ հանդիպումներ ու քննարկումներ են ունեցել Հայաստանի և Ադրբեջանի ԱԳ նախարարների և Ուրուգվայում գործող երկու երկրների դեսպանների հետ: Հանդիպման ավարտին ԱԳ նախարարը շնորհավորել է ՀՀ և ԼՂՀ ժողովուրդների Սուրբ ծնունդը՝ հույս հայտնելով, որ մոտ ապագայում ԼՂ-ն կստանա միջազգային ճանաչում: