ՄԱԿ-ի գլխավոր քարտուղարը ողջունել է Ֆրանսիայում ահաբեկչական գրոհների զոհերի հիշատակին նվիրված երթը

ՄԱԿ-ի գլխավոր քարտուղար Պան Գի Մունը ողջունել է Ֆրանսիայում ահաբեկչական գրոհների զոհերի հիշատակին նվիրված երթը, որը հունվարի 11-ին կայացել է Փարիզում, տեղեկացնում է «Արմենպրես»-ը:

«Նա խորապես հուզված էր երթի և վերջին մի քանի օրերին գլոբալ համերաշխության դրսևորման կադրերից»,- ասված է ՄԱԿ-ի մամուլի ծառայության հաղորդագրության մեջ: Փաստաթղթում նշվում է, որ Փարիզում անցկացված երթի ընթացքում ՄԱԿ-ը ներկայացնում էր գլխավոր քարտուղարի հատուկ ներկայացուցիչ Ստեֆան դե Միստուրան:

Հաղորդագրության մեջ նաև ասված է, որ Պան Գի Մունը «ամենայն լրջությամբ է վերաբերվում ծայրահեղականությանը դիմակայելու, հակասեմականության և խտրականության այլ դրսևորումների դեմ պայքարելու գործին»: Բացի այդ, ՄԱԿ-ի գլխավոր քարտուղարը պաշտպանում է խոսքի և ինքնաարտահայտման ազատությունը, հաղորդել է մամուլի ծառայությունը:

Ըստ ՌԻԱ «Նովոստիի»՝ փաստաթղթում նշվում է, որ ՄԱԿ-ի գլխավոր քարտուղարը կոչ է անում միջազգային հանրակցությանը՝ ակտիվացնել հանդուրժողության տարածման ջանքերը: Ընդսմին Պան Գի Մունը հորդորել է պայքարել բռնության դեմ՝ հարգելով մարդու իրավունքները և ընդունելով իրավունքի գերակայությունը, ինչպես նաև նախազգուշացրել է մուսուլմանների դեմ հալածանքներից:

Փարիզի երթի կազմակերպիչների գնահատումների համաձայն՝ դրան մասնակցել է առնվազն 1,5 մլն մարդ: Համանման միջոցառումներ են անցկացվել երկրի նաև այլ քաղաքներում: Ֆրանսիայի ՆԳ նախարարության տվյալներով՝ ընդամենը հանրապետության փողոցներ է դուրս եկել առնվազն 3,7 միլիոն մարդ: