Ուկրաինայում հակամարտության զոհերի թիվը հասել է առնվազն 4808-ի. ՄԱԿ

Ուկրաինայի արևելքում հակամարտության զոհերի թիվը անցյալ տարվա ապրիլից ի վեր հասել է առնվազն 4808-ի: Այդ մասին, ինչպես տեղեկացնում է «Արմենպրես»-ը, հաղորդվում է ՄԱԿ-ի հումանիտար հարցերի համակարգման վարչության հաշվետվության մեջ, որը հրապարակվել է հունվարի 11-ին:

«Ապրիլի կեսից մինչև 2015 թվականի հունվարի 6-ը Ուկրաինայի արևելքում սպանվել է առնվազն 4808 մարդ (ներառյալ կործանված մալայզիական Boeing-ում գտնվող 298 ուղևորներն ու անձնակազմի անդամները), վիրավորվել է 10 հազար 468 մարդ»,- ասված է զեկույցում: Վարչության նախորդ հաշվետվության մեջ, որը ներկայացվել էր դեկտեմբերի վերջին, նշվում էր 4771 զոհվածների և 10 հազար 360 վիրավորների մասին:

ՄԱԿ-ում հայտնել են, որ հարկադիր վերաբնակների թիվը գերազանցել է մեկ միլիոնը. 634 հազար բնակիչներ դարձել են ներքին վերաբնակներ, ևս 594 հազարը փախել են հարևան երկրներ՝ առավելապես Ռուսաստան: Վարչության զեկույցում նաև նշվում է, որ մարտական գործողությունների գոտում շարունակում է մնալ մոտավորապես 5,2 մլն մարդ, ընդ որում 1,4 միլիոնը «չափազանց խոցելի վիճակում են և հումանիտար օգնության կարիք ունեն»:

«Հակամարտության գոտուց տագնապալի հաղորդումներ են ստացվում այն մասին, որ հազարավոր մարդիկ չափազանց խոցելի վիճակում են և օգնության կարիք ունեն: Ի լրումն ֆինանսական խնդիրների, շատերը զրկված են սննդամթերք և դեղորայք գնելու հնարավորությունից և ապրում են ձմեռվա ցրտի պայմաններում»,- ասված է զեկույցում: Ինչպես նշում է ՏԱՍՍ գործակալությունը, Ուկրաինայի արևելքին բժշկական օգնություն ցուցաբերելու հարցերը հանգամանորեն կքննարկվեն հունվարի 15-ին ՄԱԿ-ի Ժնևի բաժանմունքում, որտեղ կկայանա խորհրդաժողով Առողջապահության համաշխարհային կազմակերպության և միջազգային դոնորների մասնակցությամբ: