Թուրքիային և Ադրբեջանին «սև օրեր» են սպասում. թուրք պատգամավորը՝ Ֆրանսիայում ահաբեկչության մասին

Թուրքիայի գլխավոր ընդդիմադիր Ժողովրդահանրապետական կուսակցության միջազգային հարցերով փոխնախագահ Ֆարուք Լողօղլուն հայտարարել է, որ Սիրիայի հետ կապված' երկրի իշխող «Արդարություն և զարգացում» կուսակցության (ԱԶԿ) կատարած քայլերը նոր վտանգներ են ստեղծում տարածաշրջանի երկրների համար: Նա ասել է, որ «Իրաքի և Լևանտի իսլամական պետության» (ԻԼԻՊ) նման ահաբեկչական կազմակերպություններն ուժեղացել են հենց Թուրքիայի իրագործած քաղաքականության արդյունքում:

Ինչպես հաղորդում է «Արմենպրես»-ը' վկայակոչելով թուրքական «Ջումհուրիեթ» թերթը, Լողօղլուն ասել է, որ Սիրիայում Բաշար Ասադի ուժերի դեմ ջիհադին միացած արմատական խմբավորումները, որոնց կազմում մեծ թվով թուրքեր և ադրբեջանցիներ կան, Ադրբեջանի և Թուրքիայի համար պոտենցիալ ահաբեկչության աղբյուր են հանդիսանում: Նրա խոսքով' Սիրիայի վերաբերյալ պաշտոնական Անկարայի քաղաքականությունը տարածաշրջանի համար լրացուցիչ դիմակայություն է ստեղծելու:

«Սիրիայում ընդիմադիրներին Թուրքիայի կողմից ցույց տրվող աջակցությունը, սխալ քաղաքականություն լինելով, օգնություն էր ահաբեկիչներին: Արդյունքում' տարածաշրաջանում սկսեց ուժեղանալ ԻԼԻՊ-ի նման ահաբեկչական խմբավորումը»,- ասել է նա:

Թուրք կուսակցական գործիչը Ֆրանսիայում տեղի ունեցած ահաբեկչական գործողությունը մեկնաբանել է հետևյալ կերպ. «Սիրիայում կռվելու համար Թուրքիայի սահմանով մարտիկներ են անցնում Ադրբեջանից և Եվրոպայից: Այնտեղ ահաբեկիչների կազմում մեծ թվով թուրքեր և ադրբեջանցիներ են կռվում: Բոլոր այս գործոնները ցույց են տալիս, որ Թուրքիայի և Ադրբեջանի գլխավորությամբ տարածաշրջանի երկրներին սև օրեր են սպասում: Քանի որ Սիրիայում կռվող ծայրահեղականներն իրենց երկրներ վերադառնալուց հետո շարունակելու են ահաբեկչական գործողությունները: Ֆրանսիայում իրագործված ահաբեկչական գործողությունն ազդանշան է այն բանի, որ նոր ծայրահեղական ալիքը թափանցելու է նաև այլ երկրներ»,- հայտարարել է ընդդիմադիր պատգամավորը:

Լողօղլուի կարծիքով' խնդիրը լուծելու համար Թուրքիայի և Ադրբեջանի միջև բանակցությունները պետք է ինտենսիվացվեն: «Սակայն, չեմ հավատում, որ դա հնարավոր կլինի իրականացնել մոտ ժամանակում: Քանի որ Սիրիայի նկատմամբ Թուրքիայի կառավարության որդեգրած քաղաքականությունն այդպիսի հնարավորություն չի ընձեռում»,- ասել է ԺՀԿ փոխնախագահը: