Ֆրանսիայում հակաահաբեկչական պլանի իրականացման համար գործի կդրվի 8470 զինվորական

Աշխարհ 12 Հունվար, 2015 14:39

Ֆրանսիայում ահաբեկչական գործողությունների վտանգը պահպանվում է: Այս մասին, ինչպես տեղեկացնում է «Արմենպրես»-ը, հայտարարել է երկրի վարչապետ Մանյուել Վալսը՝ ելույթ ունենալով BFM հեռուստաալիքի եթերում:

«Ֆրանսիայում ահաբեկչական գործողությունների վտանգը պահպանվում է: Ահաբեկչության դեմ պայքարի «Վիժիպիրատ» պլանը կշարունակվի իրականացվել իր ամենաբարձր մակարդակով»,- ասել է նա: Վարչապետը հավելել է, որ հակաահաբեկչական պլանի իրականացման համար գործի կդրվի 8470 զինվորական:

«Երկրի ղեկավարությունը պետք է անհրաժեշտ ամեն ինչ անի անվտանգությունն ապահովելու համար: Մենք պետք է ամենամոտ ժամանակներս՝ առաջիկա ամիսներին, մշակենք ծայրահեղականության դեմ պայքարի լրացուցիչ միջոցառումներ»,- ասել է Վալսը:

Charlie Hebdo երգիծական հանդեսի վրա զինված հարձակումը կատարվել է անցած չորեքշաբթի օրը՝ հունվարի 7-ին: Զոհվել է 12 մարդ՝ տասը լրագրող և շենքը պահպանող երկու ոստիկան, ևս 11 մարդ վիրավորվել է: Ֆրանսիայի ներքին գործերի նախարարության տվյալներով՝ հարձակվողները եղել են երեք հոգի: Նրանցից մեկը նույն օրը հանձնվել է ոստիկանությանը: Մնացած երկուսի՝ Շերիֆ և Սայիդ Քուաշի եղբայրների համազգային հետախուզում է հայտարարվել, և հունվարի 9-ին՝ հարձակումից հետո երկու օր անց, նրանք հայտնաբերվել են Փարիզից 60 կիլոմետր հյուսիս ընկած շրջանում և ոչնչացվել հատուկ գործողության արդյունքում:

Քուաշի եղբայրների վերացման հատուկ գործողության հետ գրեթե միաժամանակ ուժայինները Փարիզի կենտրոնում՝ Վենսենյան դարպասների մոտ, գրոհել են կոշերային մթերքների խանութի շենքի վրա, որտեղ 32-ամյա իսլամիստ Ամեդի Քուլիբալին պատանդներ էր վերցրել: Հատուկ նշանակության ջոկատի գործողությունների շնորհիվ նա ոչնչացվել է: Ահաբեկչի, որը գրոհից ոչ շատ առաջ BFM հեռուստաալիքին հայտարարել էր, որ «Իսլամական պետություն» խմբավորման անդամ է, զոհ է դարձել չորս մարդ, հաղորդել է ՏԱՍՍ-ը: