ԵԱՀԿ-ն հրապարակել է «իմաստունների խորհրդի» կազմը

Եվրոպայի անվտանգության և համագործակցության կազմակերպությունը (ԵԱՀԿ) ներկայացրել է «իմաստունների խորհրդի»՝ Եվրոպայի անվտանգության հարցերով զբաղվող ազդեցիկ գործիչների խմբի կազմը: Այդ մասին, ինչպես տեղեկացնում է «Արմենպրես»-ը, ասված է կազմակերպության կայքում հրապարակված հաղորդագրության մեջ: Խմբում Ռուսաստանը ներկայացնելու է ՌԴ-ի արտաքին և պաշտպանական քաղաքականության գծով խորհրդի նախագահության պատվավոր նախագահ Սերգեյ Կարագանովը:

15 մարդուց բաղկացած «իմաստունների խորհուրդում» տեղ են գտել նաև Լատվիայի նախկին նախագահ Վայրա Վիկե Ֆրեյբերգան, Իտալիայի արտաքին գործերի նախկին նախարար Էմմա Բոնինոն, ֆրանսիացի դիվանագետ Ժան Մարի Գուզեննոն, որը 2000-ից մինչև 2008 թվականն զբաղեցրել է ՄԱԿ-ի գլխավոր քարտուղարի՝ խաղաղապահ գործողությունների հարցերով տեղակալի պաշտոնը, ինչպես նաև Վրաստանի արտաքին գործերի նախկին նախարար Սերգեյ Քափանաձեն և Լեհաստանի ԱԳ նախկին նախարար Ադամ Ռոտֆելդը:

ՏԱՍՍ-ը հիշեցնում է, որ դեկտեմբերին ԵԱՀԿ-ի գործող նախագահ, Շվեյցարիայի նախագահ Դիդյե Բուրքհալտերը, որը կազմակերպության ղեկավարությունը փոխանցել է Դաչիչին, հայտարարել է, որ «իմաստունների խորհուրդն» առաջին անգամ կհավաքվի 2015 թվականի փետրվարին Մյունխենի անվտանգության խորհրդաժողովի շրջանակներում: «Խորհուրդը պետք է նպաստի անվտանգության, եվրատլանտյան և եվրասիական տարածաշրջաններում վստահության վերականգնման և ԵԱՀԿ-ի սկզբունքների ամրապնդման հարցերի շուրջ ներկայացուցչական և կառուցողական երկխոսության ծավալմանը»,- ընդգծել է նա: