Սնանկացած Cyprus Airways-ի ինքնաթիռները վարկատուներից «թաքցրել են» Մեծ Բրիտանիայում

Կիպրոսի Cyprus Airways ընկերության, որը հունվարի 9-ին դադարեցրել է իր գործունեությունը, օդաչուներն ավիաընկերության բոլոր ինքնաթիռներն իջեցրել են Մեծ Բրիտանիայի ռազմաօդային ուժերի՝ Քարդիֆի մերձակա նախկին բազայի օդանավակայանում, տեղեկացնում է «Արմենպրես»-ը՝ հղում անելով բրիտանական MailOnline-ին:

Կիպրոսի ազգային ավիափոխադրողը հունվարի 9-ին զրկվել է թույլատրագրից այն բանից հետո, երբ Եվրահանձնաժողովը վճիռ է կայացրել, որ այն անօրինականորեն ստացել է պետական լրահատկացումներ՝ դրանով իսկ խախտելով մրցակցության վերաբերյալ Եվրամիության կանոնները, և պետք է անհապաղ 65 միլիոն եվրո վերադարձնի տրամադրված 100 միլիոն եվրո միջոցներից: Քանի որ ֆինանսական աղետի ենթարկված ընկերությունն այդ փողը չուներ, ապա այն փաստորեն դարձել է սնանկ և հարկադրված է եղել հայտարարել ինքնալուծարման մասին:

Հենց նույն օրը Կիպրոսի կառավարությունն ընկերությանը զրկել է թույլատրագրից: Սակայն հունվարի 11-ին ընկերության օդաչուները բոլոր վեց ինքնաթիռները «թաքցրել են» Մեծ Բրիտանիայի St Athan օդանավակայանում, որպեսզի դրանք չընկնեն վարկատուների անունից գործող դատական պրիստավների ձեռքը՝ ավելի ուշ այդ նավատորմի հիմքի վրա ավիաընկերությունը վերականգնելու հույսով, հաղորդել է ՏԱՍՍ-ը: