Վերջին մեկ տարում ՄԱԿ-ի 60-ից ավելի աշխատակից է սպանվել իր պարտականությունները կատարելիս

2014 թվականին ՄԱԿ-ի առնվազն 61 աշխատակից է սպանվել իր պարտականությունները կատարելիս: Ինչպես տեղեկացնում է «Արմենպրես»-ը, հղում անելով Associated Press գործակալությունը, զոհվածներից 33-ը խաղաղապահներ են, 16-ը՝ քաղաքական անձինք, 9-ը՝ պայմանագրային ծառայող և 3-ը՝ խորհրդատու: Սպանվածների թիվն աճել է 2013 թվականի՝ 58-ի և 2012-ի՝ 37-ի համեմատությամբ:

Մալիի հյուսիսում ռազմական գործողությունները ՄԱԿ-ի խաղաղապահ ուժերի զորակազմի 28 զինծառայողի կյանք են խլել: Գազայի հատվածում պաղեստինա-իսրայելական հակամարտության հետևանքով զոհվել է 11 քաղաքացիական մասնագետ:

ՌԻԱ Նովոստին նշում է, որ ՄԱԿ-ի բաժանմունքում Անձնակազմի համակարգող խորհրդի նախագահ Յան Ռիչարդսը կոչ է արել կազմակերպությանը համապատասխան միջոցներ ձեռնարկել աճող վտանգներին դեմ հանդիման իր աշխատակիցների անվտանգությունն ապահովելու նպատակով: