Ռուս պատգամավորները կորել են Անտարկտիդայում. ահազանգել են օգնականները

Ռուսաստանի Դաշնության Պետական դումայի «Եդինայա Ռոսիա» խմբակցության պատգամավորներ Ալեքսանդր Սիդյակինը և Օլեգ Սավչենկոն կորել են Անտարկտիդայում: Ինչպես հաղորդում է «Արմենպրես»-ը, այս մասին Slon.ru ռուսական կայքին տեղեկացրել է Ալեքսանդր Սիդյակինի մամուլի խոսնակ Պավել Սկլյանչուկը: Նա ընդգծել է, որ կորած մյուս պատգամավորի՝ Սավչենկոյի օգնականը ևս չի կարողանու մ կապ հաստատել նրա հետ:

Պավել Սկլյանչուկը հայտնել է, որ պատգամավորները պետք է հաղթահարեին Վինսոն լեռնազանգվածի բարձունքը, որն ամենաբարձր կետն է Անտարկտիդայում: Նա պարզաբանել է, որ մարզումային գոտուց դեպի լեռը պատգամավորները շարժվել են էքսկուրսավարի ուղեկցությամբ: Նրանք ցանկացել են լեռան գագաթին բարձրացնել Ռուսաստանի, Թաթարստանի և Վոլգոգրադի մարզի դրոշները:

Պատգամավորները լեռան բարձունքը պետք է հաղթահարեին փուլերով, որոշակի ընդմիջուներով ճնշմանը և օդում թթվածնի մակարդակին հարմարվելու համար: Պատգամավորները դեռ օրեր առաջ պետք է արբանյակային հեռախոսների միջոցով կապի դուրս գային վերջին փուլից առաջ, սակայն չեն արել դա:

Պատգամավորի օգնականն ընդգծել է նաև, որ Անտարկտիդայում անկայուն ջերմաստիճան է: Նախատեսվել է, որ այնտեղ կլինի -10 աստիճան ցուրտ, սակայն եղել է -45 աստիճան, ինչն ուղեկցվում է ուժեղ քամիներով: Նա նշել է, որ դեռևս վաղ է խոսել որոնողափրկարարական գործողություններ սկսելու մասին: Միևնույն ժամանակ եղանակային պայմաններն էլ թույլ չեն տալիս ինքնաթիռ ուղարկելու համար: Սկլյանչուկը տեղեկացրել է նաև, որ պատգամավորները փորձառու լեռնագնացներ են:

Պետդումայի պատգամավոր Ալեքսանդր Սիդյակինը իր մտադրության մասին հայտնել է դեկտեմբերի 25-ին: Նա «Թվիթեր»-ի իր միկրոգլոգում կատարել է հետևյալ գրառումը. «Եթե այս գրառումը հավաքի 11 հազար ռեթվիթ մինչև նոր տարի, ես կգնամ Անտարկտիդա Ռուսաստանի դրոշը ամենաբարձր կետում բարձրացնելու համար»: «Թվիթեր»-ում գրառման հայտնվելու պահին այն միանգամից 1600 ռեթվիթ է հավաքել: