Ֆրանսիացի իմամը Մուհամեդ մարգարեի ծաղրանկարում դատապարտելի ոչինչ չի տեսել

Ֆրանսիական Ալֆորվիլ քաղաքի իմամ Աբդելալի Մամունն ուսումնասիրել է «Շառլի հեբդո» երգիծական հանդեսի վերջին համարը և առաջին էջում պատկերված Մումահեդ մարգարեի ծաղրանկարում ոչ մի սարսափելի բան չի տեսել:

Ինչպես հաղորդում է «Արմենպրես»-ը, ֆրանսիական «Էրոպ-1» ռադիոկայանին տված հարցազրույցում իմամն ասել է. «Այդ բոլորի մեջ ես վիրավորական ոչինչ չեմ տեսնում»:

Նրա խոսքով` նկարը ծաղրում է ոչ թե իսլամը, այլ ծայրահեղականությունը, և այդ պատճառով դրան պետք է հանգիստ վերաբերվել:

Մուհամեդ մարգարեին պատկերելու փաստը ևս նրան չի հուզում. «Տվյալ դեպքում նկարն արվել է մուսուլման չհանդիսացող մարդկանց կողմից: Նրանք ունեն դա անելու իրավունքը», -պարզաբանել է նա: Իմամը հավելել է, որ անձամբ իրեն` որպես մահմեդականի, նման նկարները դուր չեն գալիս, սակայն, դա չի նշանակում, որ ոչ ոք չպետք է դրանք հրատարակի:

Չորեքշաբթի «Շառլի Հեբդո» հանդեսը հրատարակվել է աննախադեպ 3 մլն տպաքանակով, որից 300 հազարը պետք է վաճառվի Ֆրանսիայի սահմաններից դուրս:

Նոր համարի շապիկին պատկերված է Մուհամեդ մարգարեն, որի այտով արցունք է գլորվում: Ձեռքում նա բռնել է «Je suis Charlie» («Ես Շառլին եմ») գրությամբ արտահայտություն, որը դարձել է հանդեսի խմբագրատան վրա ահաբեկչական գործողության արդյունքում տուժածների պաշտպանության լոզունգ: Նկարի տակ սև գույնով գրված է` «Ամեն ինչ ներված է»:

Մի շարք երկրների, այդ թվում` Իրանի և Թուրքիայի իշխանությունները դատապարտել են հրապարակումը:

Հունվարի 7-ին Փարիզի կենտրոնում գնդակոծվել է «Շառլի հեբդո» շաբաթական երգիծական հանդեսի խմբագրատունը: Ահաբեկչական գործողության արդյունքում 12 մարդ են զոհվել, նրանցից 8-ը` լրագրողներ: Եվս 11 մարդ վիրավորվել է: Ահաբեկիչները` Կուաշի եղբայրները սպանվել են հունվարի 9-ին: