Քեմերոնը ժամանել է Վաշինգտոն՝ Օբամայի հետ քննարկելու տնտեսության և անվտանգության հարցերը

Այցով ԱՄՆ ժամանած Մեծ Բրիտանիայի վարչապետ Դևիդ Քեմերոնը և ԱՄՆ-ի նախագահ Բարաք Օբաման հունվարի 16-ին քննարկելու են տնտեսական զարգացման, առևտրի և անվտանգության հարցեր, տեղեկացնում է «Արմենպրես»-ը՝ հղում անելով Սպիտակ տանը:

Բանակցություններից հետո նրանք պլանավորում են պատասխանել ամերիկացի և բրիտանացի լրագրողների հարցերին:

«Ինտերֆաքս»-ը նշում է, որ հունվարի 15-ի երեկոյան Օբաման աշխատանքային ընթրիք է տվել Մեծ Բրիտանիայի վարչապետի օգտին:

Times թերթում հունվարի 15-ին հրապարակված համատեղ հոդվածում Քեմերոնը և Օբաման հավաստել են, որ Մեծ Բրիտանիան և ԱՄՆ-ը «կշարունակեն ճնշում գործադրել Ռուսաստանի վրա՝ Ուկրաինայի ճգնաժամը դիվանագիտական ճանապարհով կարգավորելու համար»: Նրանք նշել են, որ իրենք «կշարունակեն դիմակայել Ուկրաինայում Ռուսաստանի գործողություններին», որոնք, քաղաքական գործիչների կարծիքով, «ագրեսիվ են»: «Եթե մենք թույլ տանք, որ միջազգային իրավունքի նման արմատական խախտումներն անպատիժ մնան, ապա կտուժենք անկայունությունից, որը կհետևի դրան,- պնդում են Քեմերոնը և Օբաման:- Մենք աներկիմաստ ազդանշան ենք ուղարկել. միջազգային հանրակցությունը չի աջակցելու Ուկրաինան ապակայունացնելու Ռուսաստանի փորձերին»:

Մեծ Բրիտանիայի և ԱՄՆ-ի ղեկավարները մտադրություն են հայտնել այսուհետև էլ օգնություն ցուցաբերել Կիևին տնտեսության և ժողովրդավարության ամրապնդման գործում: