Ադրբեջանցի մի ամբողջ ընտանիք փախչել է Սիրիա` միանալու մոջահեդներին

Ադրբեջանի Շաքիի շրջանի Դաշյուզ գյուղի բնակիչ Էլնուրա Մամեդովան իր երեք անչափահաս երեխայի հետ փախչել է Սիրիա: Այս մասին, ինչպես հաղորդում է «Արմենպրես»-ը, APA TV-ին հայտնել է նրա 84-ամյա սկեսուրը՝ Հումայ Մամեդովան:

Հումայ Մամեդովան պատմել է, որ Սիրիա են մեկնել նաև Էլնուրա Մամեդովայի մայրը՝ Գարիբա Շաբանովան, նրա քույրն ու ամուսինը՝ Բահար և Դաշգըն Ալխասովները: Նրանք իրենց հետ տարել են նաև իրենց երկամյա թոռնուհուն:

9 հոգուց բաղկացած խումբը Բելոքանից անցնելով Վրաստան, այնտեղից մենկնել է Թուրքիա և հասել Սիրիա:

Սկեսուրի խոսքով՝ Էլնուրա Մամեդովան երեխաներին իր հետ Սիրիա է տարել առանց ամուսնու՝ Իբրահիմ Մամեդովի թույլտվության, ով ներկայումս աշխատում է Ռուսաստանում: Նա ասել է, որ Էլնուրա Մամեդովան Բաքվում նոտար է գտել, ով կեղծ փաստաթուղթ է տվել, թե իբր հայրը համաձայն է երեխաների Սիրիա մեկնելուն:

Մամեդովների ընտանիքը դիմել է Ադրբեջանի իրավապահ մարմիններին և Թուրքիայի դեսպանատուն՝ խնդրելով վերադարձնել երեխաներին:

Նշվում է, որ ադրբեջանցի ընտանիքը Սիրիա է մեկնել այնտեղ ահաբեկչական խմբավորումների կազմում կառավարական ուժերի դեմ կռվող իրենց մերձավոր մոջահեդների պահանջով:

Ադրբեջանական ԶԼՄ-ներն ավելի վաղ հայտնել էին, որ Սիրիայում ապստամբների կողմից նախագահ Բաշար Ասադի դեմ կռվում են մեծ թվով Ադրբեջանի քաղաքացիներ, իսկ Սիրիայում և Իրաքում ամբողջ պատերազմի ընթացքում ոչնչացվել են 300-ից ավելի ադրբեջանցիներ: 2013 թ. մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ հանուն հավատի) կատարել Սիրիայում: