Պորոշենկոն Թուրքիայի վարչապետի հետ քննարկել է Ուկրաինային ֆինանսական օգնություն տրամադրելու հարցը

Ուկրաինայի նախագահ Պյոտր Պորոշենկոն հանդիպում է ունեցել Թուրքիայի վարչապետ Ահմեդ Դավութօղլուի հետ: Այս մասին հայտնել է korrespondent.net-ը՝ հղում անելով Ուկրաինայի նախագահի մամուլի ծառայությանը:

Թուրքիայի վարչապետն իր աջակցությունն է հայտնել Ուկրաինայի ինքնիշխանությանն ու տարածքային ամբողջականությանը:

«Ուկրաինայի տարածքային ամբողջականությունն ու ինքնիշխանությունը կարևոր է ոչ միայն ձեր, այլև ողջ աշխարհի համար»,- ասել է Դավութօղլուն:

Թուրքիայի վարչապետը նշել է, որ Ուկրաինան և նրա կայունությունը կարևոր են Սևծովյան տարածաշրջանի համար: Ուկրաինայի նախագահն իր հերթին կոչ է արել համատեղ ջանքերով ապահովել տարածաշրջանի անվտանգությունը:

Դավութօղլուն նաև ընդգծել է, որ Թուրքիան չի ճանաչում Ղրիմի «անեքսիան»:

Պյոտր Պորոշենկոն մտահոգություն է հայտնել Ղրիմի թաթարների իրավունքների հարցերով:

«Այսօր Ղրիմի թաթարները մեծ ճնշման տակ են և աջակցության կարիք ունեն»,- ասել է Պորոշենկոն:

Զրուցակիցները խոսել են երկկողմ հարաբերությունների ակտիվացման մասին, մասնավորապես, ռազմատեխնիկական և էներգետիկ ոլորտներում:

Խոսվել է նաև Ուկրաինային ֆինանսական աջակցության մասին՝ ԱՄՀ-ում համագործակցության շրջանակներում, ինչպես նաև ուկրաինական տնտեսության մեջ թուրքական ներդրումների մասին: