Էբոլա վիրուսի զոհերի թիվն աշխարհում հասել է 8641-ի. ԱՀԿ

Էբոլա վիրուսի հարուցած հիվանդության զոհերի թիվն աշխարհում հասել է 8641-ի, վարակված է 21 հազար 724 մարդ: Այդ մասին, ինչպես տեղեկացնում է «Արմենպրես»-ը, վկայում են Առողջապահության համաշխարհային կազմակերպության հրապարակած տվյալները:

Լիբերիայում մահացել է 3 հազար 605 մարդ, վարակվել՝ 8 հազար 478-ը: Սիեռա Լեոնեում մահացածներն ավելի քիչ են՝ 3 հազար 145 մարդ, բայց վարակվածներն ավելի շատ են, քան որևիցե այլ երկրում՝ 10 հազար 340 բնակիչ: Գվինեայում թե վարակվածները, թե մահացածներն զգալիորեն ավելի պակաս են, քան այս երկու պետություններում՝ կազմելով համապատասխանաբար 2 հազար 871 և 1876:

Ինչպես ընգծում է ԱՀԿ-ն, այս երեք երկրներում հիվանդության տարածման տեմպերը «շարունակում են ընկնել»: Անցալ շաբաթվա ընթացքում հիվանդության 20 դեպք է գրանցվել Գվինեայում, 8-ը՝ Լիբերիայում և 117-ը՝ Սիեռա Լեոնեում: Արևմտյան Աֆրիկայում մոլեգնող համաճարակի ընթացքում հիվանդացել են 828 բուժաշխատողներ, որոնցից 499-ը մահացել են:

ՏԱՍՍ-ը նշում է, որ հիվանդանալու դեպքեր են գրանցվել նաև Մալիում, Նիգերիայում, Սենեգալում, Իսպանիայում, Մեծ Բրիտանիայում և ԱՄՆ-ում: Սակայն այս երկրների մեծ մասում վարակվածների թիվը չի գերազանցում տասը: Բացառություն է կազմում Նիգերիան, որտեղ Էբոլա վիրուսով վարակվել է 20 և մահացել 8 մարդ: