Հասաքեում ասորական 4 գյուղ է ազատագրվել ԻՊ-ից

Քրդական ինքնապաշտպանական ուժերը «Հիրաս ալ Խաբուր» կոչվող քրիստոնյա զինյալներից կազմված խմբավորման հետ ազատագրել են «Իսլամական պետության» կողմից վերջին շրջանում գրավված ասորական 4 գյուղը, որոնք գտնվում են Սիրիայի հյուսիս-արևելքում՝ Հասաքե մարզում:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, ազատագրվել են Թել Հորմուզ, Թել Շամիրամ, Թել Նասրի և Ղբեյշ գյուղերը: Արյունալի բախումները շարունակվում են Թել Թամար քաղաքի մերձակայքում: Աղբյուրը տեղեկացնում է, որ Ղբեյշ գյուղում 4 դիակ են հայտնաբերվել, որոնցից 2-ը երեխաներ են, այրվել են տներ, դպրոց, Թել Շամիրամում գտնվող եկեղեցու մի հատվածը:

Միջազգային դաշինքի օդանավերը ԱՄՆ-ի գլխավորությամբ փետրվարի 26-ին առաջին անգամ օդային հարվածներ են հասցրել Սիրիայի հյուսիսում ԻՊ-ի վերահսկողության տակ գտնվող շրջաններին: ԻՊ-ն մի քանի օրում այդ շրջաններում 200-ից ավելի ասորիների է առևանգել: Թեժ բախումների ժամանակ շուրջ 130 ահաբեկիչ են սպանվել:

Ավելի վաղ տեղեկություններ էին ստացվել, որ փետրվարի 24-ի գիշերն «Իսլամական պետությունը» հարձակվել է ասորական գյուղերի վրա, ինչի պատճառով հազարավոր բնակիչներ ստիպված լքել են իրենց բնակավայրերը: ԻՊ-ն առևանգել է ավելի քան 220 մարդու, ովքեր բնակվում էին ասորական գյուղերում: Նրանց ձեռքերում են հայտնվել տասնյակից ավելի ասորական գյուղեր, որտեղ քրդական ուժերը լայնածավալ ռազմական գործողություններ էին սկսել ԻՊ-ի դեմ: