Գործարկուն սովորվել է անօդաչուն կառավարել մտքի ուժով

Լիսաբոնում տեղի է ունեցել Brainflight նախագծի շնորհանդեսը. մարդը կարողացել է իրականացնել անօդաչու թռչող ապարատի թռիչքը և վայրէջքը, ինչպես նաև կառավարել շարժումը բացառապես մտքի ուժով: Ինչպես տեղեկացնում է «Արմենպրես»-ը, նոր տեխնոլոգիայի մասին հաղորդել է Daily Mail-ը:

Գործարկուի գլխին դրել են էնցեֆալոգրաֆիական սաղավարտ, որը չափել է նրա ուղեղի ակտիվությունը: Մարդն իր համար մտովի պատկերացնում էր անօդաչու թռչող ապարատի հարկավոր շարժումները, իսկ հատուկ ծրագիրն ուղեղի ազդանշանները վերածում էր ապարատին հասկանալի հրամանների: Ըստ էության, օդաչուի ուղեղով հոսող էլեկտրականությունը հանդես է եկել որպես մուտքային տվյալներ անօդաչուի համար: Մեթոդիկայի ուսուցման համար պահանջվում է ոչ շատ ժամանակ, իսկ առողջության համար այն լիովին անվտանգ է, պնդում են նախագիծը մշակողները:

Համակարգը հաջողությամբ փորձարկումներ է անցել Diamond DA42 քառատեղ քաղաքացիական ինքնաթիռի թռիչքի սիմուլյատորում, և մշակողները հուսով են մոտ ժամանակներս այն փորձարկել իսկական թռիչքների ժամանակ: «Մեր մոտեցումը թույլ կտա ինքնաթիռները կառավարել այնպես պարզ ու դյուրին, ինչպես մարդիկ քայլում և վազում են: Դրա շնորհիվ պրոֆեսիոնալ օդաչուների ծանրաբեռնվածությունը կնվազի, իսկ շատ հաշմանդամներ կկարողանան յուրացնել այս մասնագիտությունը»,- հաղորդել է Tekever ֆիրմայի՝ նախագծի մասնակիցներից մեկի մամուլի տեղեկագիրը: