Ուկրաինայում կործանված Boeing-ի զոհերի հարազատներին ցուցադրել են ինքնաթիռի բեկորները

Ուկրաինայի երկնքում Malaysia Airlines ընկերության ավիահանրանավի աղետի հետևանքով զոհված ուղևորների ընտանիքներին Նիդեռլանդների ռազմական ավիաբազայում առաջին անգամ ցուցադրել են ինքնաթիռի բեկորները, տեղեկացնում է «Արմենպրես»-ը՝ հղում անելով BBC-ին:

2014 թվականի հուլիսի 17-ին Ամստերդամ-Քուալա Լումպուր երթուղով MH17 չվերթի բոլոր 298 ուղևորները և անձնակազմի անդամները զոհվել են:

Հոլանդացի փորձագետները, որոնք հետաքննում են աղետի հանգամանքները, չեն բացառում, որ մալայզիական ավիահանրանավը խփվել է հրթիռով, երբ Ուկրաինայի արևելքում թռչում էր ռազմական հակամարտության գոտու վրայով:

Հանրանավի բեկորները Նիդեռլանդների հարավի ավիաբազա են հասցվել դեռ անցյալ տարվա վերջին և տեղավորված են երեք օդանավարաններում:

Դիտելու համար ցուցադրված բեկորների թվում են ինքնաթիռի թևերը, անիվները, ֆյուզելաժի բեկորները և ձեռնածանրոցների համար նախատեսված հատվածամասերը:

Ենթադրվում է, որ մեկ շաբաթվա ընթացքում Boeing-777-ի բեկորները կդիտի զոհված ուղևորների 500 հարազատ:

Անցյալ տարվա սեպտեմբերին հրապարակվել է Նիդեռլանդների Ենթակառուցվածքի և տրանսպորտի անվտանգության հանձնաժողովի նախնական հաշվետվությունը, որի համաձայն ինքնաթիռը մեծ բարձրության վրա «օդում մասերի է բաժանվել արտաքին ներգործության հետևանքով»:

Հաշվետվության վերջնական տարբերակը, ինչպես սպասվում է, կհրապարակվի այս տարվա հոկտեմբերին: