ԱՄՆ-ն միջոցներ է ձեռնարկում քաղաքացիություն ստանալու համար հղի օտարերկրուհիների ժամանումների դեմ

Կալիֆոռնիայում ԱՄՆ-ի իրավապահ մարմիններն իրականացրել են ստուգարշավներ, որոնք նպատակ են ունեցել բացահայտելու այն ապօրինի ցանցը, որն այլ երկրների հղի կանանց օգնում է ծննդաբերելու համար ժամանել ԱՄՆ, տեղեկացնում է «Արմենպրես»-ը՝ հղում անելով BBC-ին:

ԱՄՆ-ի օրենսդրության համաձայն՝ երկրի տարածքում ծնված երեխան իրավունք ունի ստանալու ամերիկյան քաղաքացիություն: Ուստի այն օտարերկրուհիները, որոնք ցանկանում են, որ երեխան ամերիկյան քաղաքացիություն ունենա, ծննդաբերելու են ժամանում ԱՄՆ:

Բացառապես երեխայի համար քաղաքացիություն ստանալու նպատակով ԱՄՆ ժամանած հղի կանանց թվի վերաբերյալ պաշտոնական տվյալներ չկան: Տեղական իշխանությունների տվյալներով՝ միայն Կալիֆոռնիայի մի շրջանում՝ Orange County-ում, վերջին երկու տարում ծնվել է օտարերկրուհիների ավելի քան 400 երեխա, որոնք ԱՄՆ են ժամանել ծննդաբերելու ժամանակ:

Նման «կին զբոսաշրջիկների» մեծամասնությունը Չինաստանից է, հայտարարում են Կալիֆոռնիայի իշխանությունները: Քննիչների տվյալներով՝ կանայք ստիպված են լինում ԱՄՆ ուղևորությունը կազմակերպելուն օժանդակելու համար ապօրինի ցանցին վճարել 15 հազարից մինչև 50 հազար դոլար: