Ալիևն ու Բորիսովը «վերակենդանացնում» են «Նաբուկո» գազային նախագիծը

Ադրբեջանի Նախագահ Իլհամ Ալիևը, ով պաշտոնական այցով գտնվում է Բուլղարիայում, այդ երկրի վարչապետ Բոյկո Բորիսովի հետ ադրբեջանական գազը Եվրոպա փոխադրելու «Նաբուկո» նախագիծը վերագործարկելու մասին պայմանագիր են ստորագրել:

Այս մասին, ինչպես հաղորդում է «Արմենպրես»-ը, հայտնում է novinite.com լրատվական կայքը:

«Արդեն այսօր մենք պարոն Ալիևի հետ Եվրահանձնաժողովին կներկայացնենք «Նաբուկո»-ի վերակենդանացման նախագիծը», -լրագրողներին հայտարարել է բուլղար վարչապետը:

Նա նշել է, որ Բուլղարիան Եվրամիության լոյալ անդամ է, և իր երկիրը կատարել է Երրորդ էներգետիկական փաթեթի գծով բոլոր պահանջները, ինչը, մասնավորապես, դրսևորվել է ռուսաստանյան «Հարավային հոսք» գազային նախագիծը արգելափակելու որոշման մեջ:

«Բուլղարիան իր այս դիրքորոշումը կցուցաբերի նաև «Թուրքական հոսք» խողովակաշարի հարցում, որն իրագործում են Ռուսաստանը և Թուրքիան»,- ասել է Բորիսովը:

Ռուսաստանի «Հարավային հոսք» խողովակաշարին այլընտրանք համարվող «Նաբուկո» խողովակաշարը Ռուսաստանի հզոր դիմադրության և այն լցնելու համար բավարար գազ չգտնվելու պատճառով Եվրահանձնաժողովի կողմից պաշտոնապես չեղյալ է համարվել 2013 թվականին:

Ադրբեջանն իր գազը Եվրոպա փոխադրելու համար Թուրքիայի հետ համաձայնության եկավ Անդրանատոլիական և Անդրադրիատիկ (TANAP+TAP) գազային նախագծերի իրականացման հարցում: Սակայն, անցյալ տարվա դեկտեմբերի 1-ին Ռուսաստանի Նախագահ Վլադիմիր Պուտինն Անկարայում հայտատրարեց, որո դադարեցնում են «Հարավային հոսք» նախագիծը, և դրա փոխարեն Ռուսաստանից մինչև Հունաստանի սահման նույն հզրությամբ «Թուրքական հոսք» կոչված գազատար խողովակաշար կանցկացնեն, ինչը փոխեց բոլոր խաղաքարտերը տարածաշրջանի էներգետիկական քարտեզում: «Նաբուկո» նախագիծը «վերակենդանացնելու» մասին Ալիևի և Բորիսովի' Սոֆիայում արած համատեղ հայտարարությունն, այդ իմաստով, աղմկահարույց բնույթ է կրում: