«Եվրատեսիլ-2015» մրցույթը կթարգմանեն խուլերի միջազգային լեզվով

«Եվրատեսիլ-2015» երգի միջազգային մրցույթը, որը մայիսին տեղի կունենա Վիեննայում, մատչելի կլնի նաև լսողության խանգարում ունեցող մարդկանց համար: Այդ մասին, ինչպես տեղեկացնում է «Արմենպրես»-ը, լրագրողներին հայտարարել է ORF հեռուստառադիոընկերության հասարակայնության հետ կապերի տնօրեն Մարտին Բիդերմանը, որն զբաղվում է առաջիկա «Եվրատեսիլի» կազմակերպման հարցերով: Նա հիշեցրել է առաջիկա մրցույթի նշանաբանը՝ «Կառուցելով կամուրջներ»:

«Այս մրցույթը բաց կլինի ամբողջ աշխարհի առջև, շատ հանդուրժողական: Մենք ցանկանում ենք, որ բոլորը տեսնեն, որ մեր երկիրը՝ Ավստրիան, և նրա մայրաքաղաքը սրտաբաց են, և այնտեղ ուրախ են հյուրերի ժամանմանը: Ամբողջ մրցույթը կթարգմանվի խուլերի միջազգային լեզվով: «Եվրատեսիլը» տեղի կունենա Վիեննայի խոշորագույն հարթակում՝ «Վիներ Շտադտհալլեում»: Ապրիլի 6-ին սկսվել է դեկորացիաների, բեմի մոնտաժումը»,- հայտնել է Բիդերմանը:

Նրա խոսքով՝ դահլիճը, որտեղ տեղի կունենա «Եվրատեսիլը», կարող է տեղավորել մինչև 120 հազար մարդ:

Ընդամենը կանցկացվի ինը միջոցառում. երեք ցուցադրություն ժյուրիի համար, երեք հեռուստատեսային շոու և ևս երեքը՝ երեխաներով ընտանիքների համար: Միևնույն «Վիներ Շտադտհալլե» համալիրում կտեղավորվի նաև մամուլի կենտրոնը, որը կարող է ընդունել մինչև 1,7 հազար լրագրողների:

«Այս ամենի սիրտը կլինի անշուշտ բեմը: Այն ձևավորված է մեծ աչքի տեսքով, որը միաժամանակ նաև դարպասներ է, ճակատամուտք: Այդ «աչքը» բաղկացած է 1,3 հազար գլաններից, որոնք լուսավորվում են տարբեր գույներով»,- հավելել է ORF հեռուստառադիոընկերության հասարակայնության հետ կապերի տնօրենը, հաղորդել է ՌԻԱ Նովոստին:

Լուսանկարը' РИА Новости