Մասիսում տեղի կունենա Ցեղասպանության 100-րդ տարելիցին նվիրված հիշատակի արարողություն

Մասիս քաղաքում ապրիլի 11-ին կանցկացվի Ցեղասպանության 100-րդ տարելիցին նվիրված «Հիշողության պահպանումը անցյալի մասին մեզ թույլ կտա պահպանել խաղաղությունն այսօր» կարգախոսով հիշատակի արարողություն: Միջոցառումը, որն անցկացնում են Մասիսի քաղաքապետարանը և AFFA բարեգործական հիմնադրամը' կսկսվի խաչքարի բացման և օծման հանդիսավոր արարողությամբ և Հայոց ցեղասպանության 100-րդ տարելիցին նվիրված լուսանկարների ցուցահանդեսի բացմամբ:

Ինչպես «Արմենպրես»-ին տեղեկացրեց Մասիսի քաղաքապետ Սաշա Հակոբյանը' միջոցառմանը ներկա կլինեն մարզային և քաղաքային իշխանությունների ներկայացուցիչներ, բարեգործական ընկերության պատասխանատուները' Օլեսիա Կոշկինայի գլխավորությամբ, հյուրեր ՌԴ-ից, Եվրոպայից:

Խաչքարի բացման արարողությանը կմասնակցեն նաև Արարատի մարզի երեխաները, որոնք կհագնեն Ցեղասպանության 100-րդ տարելիցի խորհրդանիշ հանդիսացող անմոռուկներով շապիկներ, իսկ թիկունքներին' տարբեր լեզուներով գրված շնորհակալական խոսքեր այն երկրներին, որոնք ընդունել են ցեղասպանության փաստը: Տեղի կունենա նաև համերգային ծրագիր:

Հիշատակի արարողության շրջանակում, հաջորդ օրը' ապրիլի 12-ին մեծ էկրանի վրա Վատիկանից ուղիղ միացումով կդիտեն Ցեղասպանության 100-րդ տարելիցին նվիրված հանդիսավոր պատարագը: