«Հայաստան» հիմնադրամի միջոցներով Խաչմաչում կառուցվում է համայնքային կենտրոն

«Հայաստան» համահայկական հիմնադրամն իր Լիբանանի, Բրազիլիայի, Հոլանդիայի, Հունաստանի, Կիպրոսի տեղական մարմինների և Լեռնային Ղարաբաղի կառավարության համաֆինանսավորմամբ՝ ԼՂՀ Ասկերանի շրջանi Խաչմաչ գյուղում կառուցում է համայնքային կենտրոն: Ինչպես «Արմենպրես»-ին տեղեկացրին «Հայաստան» համահայկական հիմնադրամից, ներկայումս նորակառույցում ընթանում են ներքին հարդարման աշխատանքներ: Տ եղական մարմարով երեսպատված գեղեցիկ, ժամանակակից կառույցն ապահովված է ինժեներական ցանցով, ունի օդափոխության և ջեռուցման համակարգեր: «Շենքի կառուցումն այս ընթացքում նաև զբաղվածության հարց է լուծել, քանի որ շինարարությունում աշխատում են նաև մեր համագյուղացիները»,- ասում է գյուղապետ Մխիթար Ղահրիյանը:

Հին ու խարխուլ շենքում դեռևս գործող գյուղապետարանն ու բուժկետը գարնան վերջին կտեղափոխվեն անմիջապես շենքի հարևանությամբ վեր հառնող երկհարկանի նորակառույց կենտրոն, որտեղ կգործեն նաև գրադարանը, 150 տեղանոց հանդիսությունների դահլիճը, համակարգչային սրահը: 233 բնակիչ ունեցող համայնքն այսուհետ այստեղ կկազմակերպի նաև իր ժամանցը: «Հնի կողքին վեր բարձրացող այս կառույցը կապահովի գյուղի շարունակական առաջընթացը»,- նշել է Հիմնադրամի գործադիր տնօրեն Արա Վարդանյանը:

Հիմնադրամն իրականացրել է բազմաթիվ ծրագրեր, որոնց միասնական մասնակցություն են ունեցել աշխարհի տարբեր երկրների հայ համայնքները: Այսօրինակ ծրագրերից են Նոյեմբերյանի հիվանդանոցի վերակառուցումը, Քարին Տակի ջրամատակարարման համակարգի կառուցումը:

Տարբեր բարերարների ջանքերի շնորհիվ այսօր համայնքը բարեկեցիկ կյանքով է ապրում. գյուղն ունի մշտական ջուր, գազ, գյուղամիջյան սալահատակ բարվոք ճանապարհ, վերակառուցվել է գյուղի Սուրբ Ստեփանոս եկեղեցին: