Նախագահ Սարգսյանը լավ հնարավորություններ է տեսնում ԵԱՏՄ շուկայում գործունեություն ծավալող հայ տնտեսվարողների համար

Եվրասիական տնտեսական միությունը հիմնավորված ձևաչափ է' զարգացնելու առավելագույն շահեկան հարաբերություններ անդամ-երկրների միջև, որոնք հիմնված են ապրանքների, ծառայությունների, կապիտալի և աշխատուժի ազատ տեղաշարժի վրա: Այս մասին ասել է Հայաստանի նախագահ Սերժ Սարգսյանը' «Միր» հեռուստաընկերության «Միասին» հաղորդաշարին տված հարցազրույցի ժամանակ: Զրուցավար Եկատերինա Աբրամովայի այն հարցին, թե ԵԱՏՄ-ին անդամակցելը Հայաստանի համար ինչ նշանակություն ունի, ՀՀ Նախագահն ընդգծել է, որ դառնալով ավելի քան 170-միլիոնանոց շուկայի լիիրավ անդամ՝ հայ տնտեսավարողները ստանում են գործունեություն ծավալելու լավ հնարավորություն:

«Այս որոշումը մենք ընդունեցինք' ելնելով այն հանգամանքից, որ ԵԱՏՄ-ն հիմնավորված ձևաչափ է' զարգացնելու առավելագույն շահեկան հարաբերություններ մեր երկրների միջև, որոնք հիմնված են ապրանքների, ծառայությունների, կապիտալի և աշխատուժի ազատ տեղաշարժի վրա: Ընհանուր շուկայի նորմալ զարգացման պայմաններում բոլոր տնտեսավարողները, այդ շուկայի բոլոր մասնակիցները, այդ թվում՝ և հայ, ազատվում են մաքսային-տարիֆային և ոչ տարիֆային խոչընդոտներից: Դառնալով դեռևս ամբողջությամբ չհագեցած ավելի քան 170-միլիոնանոց շուկայի լիիրավ անդամ՝ մեր տնտեսավարողները ստանում են այդ պայմաններում գործունեություն ծավալելու լավ հնարավորություն: Դա ենթադրում է նոր աշխատատեղերի ստեղծում, լրացուցիչ եկամուտներ: Այդ պատճառով ես կարծում եմ (հաշվի առնելով, որ Բելառուսի և Ղազախստանի հետ մեր առևտրական հարաբերությունները ցածր մակարդակի վրա են գտնվում, այսինքն՝ ռեզերվ կա), այդ խնդիրների լուծմանը պրոֆեսիոնալ մոտեցման պարագայում մենք կարող ենք մեծ լավ օգուտ ստանալ»,- «Արմենպրես»-ի փոխանցմամբ' ասել է ՀՀ Նախագահը:

Հարցին, թե Հայաստանն արդոք ինչ-որ բան կորցրե՞լ է ԵԱՏՄ-ին անդամակցելու հետևանքով' ՀՀ Նախագահ Սերժ Սարգսյանն ընդգծել է, որ ցանկացած կազմակերպության ու միավորման անդամակցելով՝ երկրները ձեռք են բերում ինչպես իրավունքներ, այնպես էլ պարտականություններ:

«Միջազգային փորձը ցույց է տալիս, որ նման դեպքերում պետություններն իրենց լիազորությունների մի մասը պատվիրակում են վերազգային կառույցներին: Դա նշանակում է, որ տվյալ միությունները ստեղծվում են փոխզիջման պայմաններով: Կարծում եմ, այդ պայմաններով են ստեղծված բոլոր միություններն ու կազմակերպությունները' և ԵՄ-ն, և ԵԱՏՄ-ն: Անդամակցելով ԵԱՏՄ-ին' մենք որոշ չափով ճշգրտեցինք մեր եվրոպական օրակարգը' այն հաշվով, որ դա հարմարեցնենք ԵԱՏՄ-ի շրջանակում մեր ստանձնած պարտավորություններին: Մենք միշտ ծայր աստիճան անկեղծ ենք մեր գործընկերների հետ, ա յդ թվում՝ նաև ԵՄ-ի, և միշտ խոսել ենք զարգացող իրադարձությունների մեր տեսլականի մասին»,- ասել է նա:

Այն հարցին, թե Հայաստանի հասարակ բնակիչները հասցրե՞լ են զգալ անդամակցության դրական կողմերը' Նախագահ Սարգսյանը կարծիք է հայտնել, որ դեռ վաղ է խոսել այդ մասին' նշելով երկու պատճառով: «Առաջին' ժամանակը բավարար չէ, ընդամենը երեք ամիսը քիչ է ինչ-որ արդյունքներ ամփոփելու համար: Երկորդ' այլ պետությունների քաղաքացիներն ավելի դանդաղ են դրսևորում իրենց վերաբերմունքը դրական փոփոխությունների նկատմամբ: Բայց միաժամանակ, և ես արդեն խոսել եմ այդ մասին, մեր տնտեսավարողները ստանում են հնարավորություն ազատվելու մաքսային-տարիֆային ոչ տարիֆային խոչընդոտներից: Սերտիֆիկատների փոխադարձ ճանաչման դեպքում ծախսերը դառնում են չնչին, այդ պատճառով մրցակցություն է առաջանում: Համապատասխանաբար, հնարավորություն է ստեղծվում ավելի շատ առևտուր անել, ավելի շատ վաստակել և ունենալ մեծաթիվ աշխատատեղեր»,- ասել է ՀՀ Նախագահը:

Սերժ Սարգսյանը նշել է, որ անդամակցությունից հետո ՀՀ քաղաքացիները նաև հնարավորություն են ստացել առանց խոչընդոտների աշխատել Ռուսաստանում և մյուս երկրներում: «Նախկինում, այնուամենայնիվ, խոչընդոտներ կային: Այժմ, սեփական ընտանիքների բարեկեցությունն ապահովելու լրացուցիչ խթան է ի հայտ եկել: Մեզ համար կա նաև մի մեծ էական գործոն' այն, որ մենք նախորդ տարի ստացանք զեղչեր էներգակիրների համար, իսկ դա չափազանց ազդում է ինչպես մարդկանց բարեկեցության, այնպես էլ արադրության, առևտրի վրա: Հետևաբար այստեղ մենք, իհարկե, շահել ենք: Կարծում եմ, այ սօր առկա դժվարությունները (իսկ դրանք էական չեն) հաղթահարելուց հետո, որոշ ժամանակ անց մեր քաղաքացիները իրապես կզգան ԵԱՏՄ-ին մեր անդամակցության դրական ազդեցությունը»,- նշել է Հայաստանի Նախագահը:

Հայաստանը Եվրասիական տնտեսական միության լիիրավ անդամ է դարձել 2015թվականի հունվարի 2-ից: Համապատասխան պայմանագիրը կկնքվել էր 2014 թվականի հոկտեմբերի 10-ին, Մինսկում Բարձրագույն եվրասիական տնտեսական խորհրդի նիստի ժամանակ: Ավելի վաղ, 2014 թ. մայիսի 29-ին Ռուսաստանը, Բելառուսն ու Ղազախստանը Աստանայում ստորագրել էին Եվրասիական տնտեսական միության ստեղծման պայմանագիրը, որը գործողության ուժ ստացավ 2015թ. հունվարի 1-ից: