«Առավոտ». Շնորհակալություն, Քանյե Ուեսթ

«Առավոտ» թերթը իր խմբագրականում գրում է. «Քիմ Քարդաշյանի մասին ամեն ինչ ասվել է: Եթե կան «բարոյականության ջատագովներ», որոնք չեն հասկանում նրա այցի նշանակությունը, չեմ պատրաստվում այդ մարդկանց տարհամոզել: Այստեղ ուզում եմ բարի խոսքեր ասել ոչ միայն Քիմի և նրա քրոջ, այլև նրա ամուսնու մասին: Հայաստանում մեր հայրենակցուհուն համեստորեն, հաճախ երեխային գրկած ուղեկցող տղամարդը Քանյե Ուեսթն է՝ Միացյալ Նահանգներում և աշխարհում շատ սիրված և ճանաչված երգիչ, երաժիշտ, ռեժիսոր և դիզայներ, բազմաթիվ «Գրեմմիների» և այլ հեղինակավոր մրցանակների դափնեկիր, միլիոնատեր և գործարար:

Աշխարհում նա հայտնի է առաջին հերթին որպես «ռեփ» ոճի կատարող (խոստովանեմ, այդ երաժշտության սիրահարը չեմ), բայց Հայաստանում նրան սիրեցին որպես Քիմ Քարդաշյանի ամուսին՝ «մեր փեսա», ինչպես սիրում է ասել մեր ժողովուրդը: Այստեղ նա եկել է որպես ամուսին և հայր ու բոլորովին վատ չի զգում այդ դերից: Ես շնորհակալ եմ Քանյեից նաև այն պատճառով, որ նա ևս մի անգամ ապացուցում է հայտնի ճշմարտությունը՝ որքան մարդ կայացած է և ինքնաբավ, այնքան քիչ կարիք ունի կուրծք ծեծելու և գոչելու՝ «այդ ես եմ, դուք գիտե՞ք՝ ես ով եմ»:

Ցավոք, ես բավականին հաճախ եմ լսում այդ հարցը: Երբեմն այն հնչում է սպառնալից՝ ես ազդեցիկ եմ և քո դեմ այս կամ այն գործողությունը կձեռնարկեմ: Երբեմն այդ հարցը տրվում է դառնությամբ՝ հե՛յ գիտի ժամանակներ, երբ ինձ բոլորը ճանաչում էին: Լինում է, որ այդ հարցի մեջ նախատինք կա՝ չե՞ք ամաչում, երիտասարդ, որ ինձ չեք ճանաչում: Բոլոր դեպքերում խմբագրություն այցելող իմ հասակակիցների և ավելի բարձր տարիքի մարդկանց մեծ մասը բուն նյութին անցնելուց առաջ առնվազն 10 րոպե բացատրում են, թե ինչ պաշտոններ են ունեցել և ինչ ծառայություններ մատուցել ազգին: Որքան երկար են բացատրում, այնքան սովորաբար երկար են նրանց հոդվածները, որոնք, որպես կանոն, նվիրված են ազգը փրկելու «հրատապ ծրագրին»:

Լուսանկարը՝ PanArmenian.net-ի