Դիետոլոգը ճարպակալումը հոգեբանական խնդիրների հետևանք է համարում

Գրեթե բոլոր հիվադությունների աղբյուր հանդիսացող ու որոշ մասնագետների կողմից նաև համաճարակ համարվող ճարպակալման հիմնական պատճառը հոգեբանական խնդիրներն են: Լրագրողների հետ ապրիլի 11-ին կայացած հանդիպմանը նման կարժիք հայտնեց կլինիկական հոգեբան Արմինե Փաշայանը: «Ճարպակալումը շատ խոցելի է դարձնում մարդու օրգանիզմը, որի հետևանքով առողջական խնդիրներ կարող են առաջանալ: Մարդիկ իրենց անձնական խնդիրների, որոշակի սահմանափակումների առկայությունը հիմնականում փորձում են փոխհատուցել սննդի մեծ չափաբաժիններով»,- «Արմենպրես»-ի հաղորդմամբ' նշեց նա:

Անդրադառնալով անորեքսիայի առաջացման պատճառներին' դիետոլոգ-էնդոկրինոլոգ Հասմիկ Աբովյանը նկատեց, որ այն, որպես խնդիր, էնդոկրինոլոգիական դաշտից տեղափոխվել է հոգեբանական ոլորտ: «Անորեքսիա ունեցող մարդկանց հետ պետք է աշխատի հոգեբույժը: Այդ հիվանդությամբ տառապում են դեռևս չկայացած, իրենց ուժերի հանդեպ անվստահ, ուրիշների կարծիքից կախված և նման տիպի հոգեբանական խնդիրներ ունեցող աղջիկները»,-ընդգծեց նա և հավելեց, որ վերը նշված խնդրի կանխարգելման համար կարելի է ստեղծել բժշկական հաստատություններին կից կազմակերպություններ, որոնք նպատակաուղղված աշխատանք կտանեն երեխաների ծնողների հետ:

Հասմիկ Աբովյանը նկատեց, որ Հայաստանում ճարպակալությամբ տառապող մարդկանց թվաքանակի վերաբերյալ հստակ տվյալներ չկան, սակայն ամբողջ աշխարհում մարդկանց 50 տոկոսից ավելին ունի ճարպակալման խնդիր: «Գիտատեխնիկական առաջընթացի հետ մեկտեղ' կյանքի որակը գնալով նվազում է: Բացի այդ, մենք չպետք է մոռանանք, որ ճարպակալման հետևանքով մարդկանց կյանքը կրճատվում է 10-15 տարով»,-պարզաբանեց Աբովյանը:

Ճարպակալումը մարդու օրգանիզմում ավելցուկային ճարպահյուսվածքի կուտակում է, երբ ճարպի սինթեզման ու կուտակման գործընթացները գերակշռում են քայքայման գործընթացների նկատմամբ։