Այվազովսկու և հայկական առաջին տպագիր Աստվածաշնչի հոբելյանները կներառվեն ՅՈՒՆԵՍԿՕ-ի ցանկում

Հովհաննես Այվազովսկու և հայկական առաջին տպագիր Աստվածաշնչի հոբելյանները կներառվեն ՅՈՒՆԵՍԿՕ-ի հոբելյանների ցանկում: ՅՈՒՆԵՍԿՕ-ի Գլխավոր քարտուղարի արտաքին հարաբերությունների և հասարակայնության հետ կապերի հարցով օգնական Էրիկ Ֆալտի տեղեկացմամբ՝ Հայաստանի Հանրապետության մշակույթի նախարարության կողմից պատրաստված՝ Հովհաննես Այվազովսկու ծննդյան (Թեոդոսիա, 1817 թ.) 200-ամյակի և Հայկական առաջին տպագիր Աստվածաշնչի ստեղծման (Ամստերդամ, 1666 թ.) 350-ամյակի հայտերն ընդունվել են՝ ՅՈՒՆԵՍԿՕ-ի 2016-2017 թվականների հոբելյանների ցանկում ներառվելու համար: «Հովհաննես Այվազովսկու ծննդյան 200-ամյակը» անվանակարգը ներկայացվել է Ռուսաստանի Դաշնության հետ՝ Իտալիայի աջակցությամբ: «Հայկական առաջին տպագիր Աստվածաշնչի 350-ամյակը» անվանակարգի ներկայացմանն աջակցել են Ֆրանսիան և Նիդերլանդների Թագավորությունը:

Ըստ կանոնակարգի՝ հայտերը վերջնական հաստատման ընթացակարգով կներկայացվեն Գործադիր խորհրդի, այնուհետև՝ Գլխավոր գագաթաժողովի հաստատմանը:

1956 թվականից սկսած՝ ՅՈՒՆԵՍԿՕ-ն իր մասնակցությունն ունի անդամ պետությունների կողմից նշվող պատմական իրադարձությունները կամ հայտնի մարդկանց հո­բելյանները հանրահռչակելու գործում: Այդ նպատակով յու­րաքանչյուր 2 տարվա համար հաստատվում են ՅՈՒՆԵՍԿՕ-ի՝ հռչակավոր մարդկանց և կարևոր իրադարձությունների օրացույցները, որոնք կազմվում են անդամ երկրներից ստացված՝ համապատասխան հիմնավորմամբ հայտերով: