Հետևե´ք Պաշտպանության նախարարի օրինակին

Հոգևոր արժեքների խաթարման, առուփախի ու առուծախի մեր ժամանակներում թերևս եզակի են այն պաշտոնյաները, ովքեր շարունակում են իրենց վարքով օրինակ ծառայել հասարակությանը, ովքեր ժամանակ են գտնում իրենց աշխարհիկ հոգսերից զատ առաջ մղելու հոգևորն ու ոգեղենը:

Եվ այս ամենի մեջ ամենակարևորն այն է, որ դա մարդու և նրա տեսակի, նկարագրի անբաժանելի մասը լինի, ոչ թե պարտադրված, լայն զանգվածներին ու հավատացյալ ժողովրդին դուր գալու մարմաջ:

Անձամբ ինձ անչափ դուր է գալիս ոչ միայն ՀՀ Պաշտպանության նախարար Սեյրան Օհանյանի բարձր պրոֆեսիոնալիզմն ու ընդգծված հայրենասիրությունը, այլև նրա մարդկային ու հոգևոր կերպարն ընդհանրապես: Իսկապես հրաշալի է, որ այս ծանր պայմաններում իր ուսերին կրելով պետության պաշտպանության ծանր բեռը՝ Օհանյանը բոլոր հնարավոր առիթներով եկեղեցու կողքին է, հավատավոր ժողովրդի շարքերում:

Մենք սովորել ենք մեր բարձրաստիճան պաշտոնյաներին տեսնել անհասանելի, թիկնազորով շրջապատված, մինչդեռ օրեր առաջ այն, ինչ տեսա Արարատյան հայրապետական թեմի Ս. Սարգիս եկեղեցում՝ կրկնապատկեց հարգանքս Սեյրան Օհանյանի նկատմամբ:

Ապրիլի 5-ին Հայ Առաքելական Սուրբ Եկեղեցին նշում էր Քրիստոսի հրաշափառ Հարությունը: ԱՀԹ առաջնորդանիստ Ս. Սարգիս եկեղեցում Սուրբ Հարության հանդիսավոր ս. պատարագը մատուցեց Արարատյան Հայրապետական թեմի առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանը:

Պատարագին ներկա էին ՀՀ պաշտպանության նախարար և ԱՀԹ առաջնորդանիստ Ս. Սարգիս եկեղեցու ջրօրհնեքի խաչքավոր Սեյրան Օհանյանը՝ տիկնոջ հետ, ԱՀԹ առաջնորդանիստ ս. Սարգիս եկեղեցու ծխական խորհրդի ատենապետ Արման Վարդանյանն ու խորհրդի անդամները: Ավանդույթի համաձայն ս. պատարագի ավարտից հետո մասնակիցները առաջնորդարանի դահլիճում շնորհավորեցին միմյանց և Սրբազան Հորը:

Նույն համեստ ու զուսպ պահվածքը, մարդկանց հետ շփվելու մշակույթը և ակնհայտ անկեղծ հոգածությունը եկեղեցու նկատմամբ, այն դեպքում, երբ մեր պաշտոնյաների գերակշիռ մեծամասնությունը ուղղակի եկեղեցու տեղն անգամ չգիտի: Եվ թող Պաշտպանության նախարարը օրինակ ծառայի, որ հենց վերնախավն է իր վարքով ամրացնում և տարածում հոգևոր արժեքներ, և որքան կարևոր է, որ այս կամ այն ոլորտը ղեկավարում են բարոյական մարդիկ:

Արամ Հակոբյան

{gallery}00101/2{/gallery}