Տիկին Թյուսոյի թանգարանում հայտնվել է «Աստղային պատերազմների» Ջաբբա Հաթը

«Աստղային պատերազմների» գործող անձեր Ջաբբա Հաթիև արքայադուստր Լեայի մոմե քանդակները հայտնվել են Լոնդոնի տիկին Թյուսոյի թանգարանում, հաղորդում է «Արմենպրես»-ը՝ հղում անելով The Daily Mirror-ին: Դրանք կդառնան կինոսագային նվիրված մեծ ցուցահանդեսի բաղկացուցիչ մասը, որը կբացվի մայիսի 16-ին:

Ջաբբայի և Լեայի քանդակների ստեղծումը նկարիչներից պահանջել է շուրջ չորս ամսվա աշխատանք: Քանդակը պատկերում է մի տեսարան «Աստղային պատերազմների» վեցերորդ էպիզոդից, որն ստացել է «Ջեդայի վերադարձը» վերնագիրը: Այնտեղ Լեան, փորձելով փրկել իր սիրեցյալին՝ Հան Սոլոյին, ստրկության մեջ է ընկնում Հաթի մոտ: Աղջկա դերը ֆիլմում խաղացել է դերասանուհի Քերի Ֆիշերը, իսկ հրեշի կերպարն ստեղծվել է կառավարվող տիկնիկի միջոցով:

Ցուցահանդեսը կներառի 11 ամենաճանաչված դրվագները կինոհերոսապատումի բոլոր վեց էպիզոդներից: Ցուցադրանքում, օրինակ, տեղ կգտնի Դարտ Վեյդերի և Լյուկ Սքայուոքերի ճակատամարտի տեսարանը «Մահվան աստղի» վրա: Թանգարանում կցուցադրեն «Աստղային պատերազմների» նաև այլ նշանակալի գործող անձերի. Հան Սոլոյին, Օբի Վան Քենոբիին, Քվայ Գոն Ջինին և Էնակին Սքայուոքերին: Քանդակների վրա շարունակում են աշխատել 20-ից ավելի նկարիչներ:

Լուսանկարը՝ ТАСС