Մայրաքաղաքի տարբեր հատվածներում տեղադրվել են Ցեղասպանության տարելիցին նվիրված պաստառներ

Հայաստանի մայրաքաղաքի տարբեր հատվածներում գովազդային վահանակները կհիշեցնեն բնակիչներին և մայրաքաղաքի հյուրերին Հայոց Ցեղասպանությունը վերապրածների և ականատեսների մասին: Ինչպես «Արմենպրես»-ը տեղեկացավ ծրագիրն իրականացնող Doping Creative Advertising ընկերությունից, «Թանգարան բաց երկնքի տակ» նախագծի շրջանակներում տեղադրված մոտ բազմապրոֆիլ գովազդային 300 կրիչ ներով «Երախտագիտություն», «Վերածնունդ» և «Արցունքից դեպի արդյունք» թեմաներով պաստառները կհիշեցնեն քաղաքացիներին հավերժ հիշվելու արժանի հայ և օտարերկրյա գործիչների մասին:

«Երախտագիտություն» թեմատիկ պաստառների միջոցով երախտագիտություն է արտահայտվելու այն համաշխարհային քաղաքական գործիչներին, գրողներին, բանաստեղծներին, միսիոներներին, ովքեր օգնություն են ցուցաբերել Մեծ Եղեռնը վերապրածներին և իրենց ներդրումն են ունեցել Հայոց Ցեղասպանության ճանաչման գործընթացում: Պաստառների վրա անցորդները կտեսնեն Հենրի Մորգենթաուին, Մարիա Յակոբսենին, Անատոլ Ֆրանսին, Բոդիլ Բյուրնին, Ալմա Յոհանսոնին,Հեդվիգ Բյուլին, Կարեն Յեպպեին և այլոց:

«Վերածնունդ» և «Արցունքից դեպի արդյունք» ենթակոնցեպտների պաստառների վրա տեղ են գտել այն մեծանուն հայերի լուսանկարները, ովքեր, վերապրելով Մեծ Եղեռնը, իրենց կյանքում և մասնագիտական ոլորտում համաշխարհային հռչակ ունեցան: Պաստառներին պատկերված են նաև 1915թ.-ից հետո կառուցված մի շարք պատմամշակութային շինությունների և հայ ազգի կողմից տարած նշանակավոր հաղթանակները ներկայացնող լուսանկարներ:

«Հիշողություն» ենթակոնցեպտի պաստառներին են այն հայերի պատկերները, ովքեր իրենց հուշագրերում, ստեղծագործություններում և, առհասարակ, հիշատակել են Հայոց ցեղասպանությունը: Նրանց թվում են Կոմիտասը, Ավրորա Մարդիգանյանը: «Համաշխարհային ճանաչում» կոնցեպտն իրենից ներկայացնում է աշխարհի քարտեզը, որի վրա գունային լուծումներով առանձնանում են այն պետությունները, որոնք ճանաչել են Հայոց Ցեղասպանությունը:

Լուսանկարը՝ Doping Creative Advertising ընկերության ֆեյսբուքյան էջից