ԱՄՆ-ն աղետյալ Նեպալին իր օգնությունն ավելացրել է մինչև 26 մլն դոլար

ԱՄՆ-ն ավերիչ երկրաշարժիչ տուժած Նեպալին ցույց տրվող իր օգնությունն ավելացրել է մինչև 26 մլն դոլար: Այդ մասին, ինչպես տեղեկացնում է «Արմենպրես»-ը, հայտնել է Պետդեպարտամենտի պաշտոնական ներկայացուցիչ Ջեֆ Ռատկեն:

«ԱՄՆ-ի միջազգային զարգացման գործակալության (USAID) ղեկավարի պաշտոնակատար Ալֆոնսո Լենարտը մայիսի 5-ին ավարտել է իր այցը Նեպալ՝ հայտարարելով Նեպալին լրացուցիչ 11 մլն դոլարի օգնություն տրամադրելու մասին՝ երկրաշարժից հետո երկիրը վերականգնելու համար: Այդպիսով, այդ պետությանն ԱՄՆ-ի միագումար օգնությունը հասել է 26 մլն դոլարի»,- նշել է նա:

Լենարտը և Նեպալի վարչապետ Սուշիլ Կոիրալան քննարկել են, մասնավորապես, «աղետի հետևանքները վերացնելու համար ԱՄՆ-ի ռազմաօդային ուժերի օգտագործման հնարավորությունը»: Ռատկեն նաև ընդգծել է, որ հանրապետության տարածքում շարունակում են աշխատել ամերիկացի փրկարարներն ու զինվորականները:

Ավելի վաղ Եվրահանձնաժողովը լրացուցիչ 16,6 մլն եվրո է հատկացրել Նեպալում երկրաշարժի հետևանքները հաղթահարելու համար: ԵԽ-ն ընդգծել է, որ հանրակցությունն արդեն 22,6 մլն եվրո է հատկացրել Նեպալին: Եվրահանձնաժողովը նաև նշել է, որ երկրաշարժից Նեպալի կրած վնասի ամբողջական գնահատումից հետո Եվրամիությունը կքննարկի երկրին հետագա օգնության հնարավորությունը: «Մենք կօգնենք այնքան, որքան հարկավոր կլինի»,- ասել է մարդասիրական օգնության և ճգնաժամային կառավարման հարցերով եվրակոմիսար Խրիստոս Ստիլիանիդիսը:

Ըստ վերջին տվյալների՝ Նեպալում ավերիչ երկրաշարժից զոհվածների թիվն անցել է 7,5 հազարից, տուժել է 14 հազար 536 մարդ: 7,9 մագնիտուդով երկրաշարժն ապրիլի 25-ին տեղի է ունեցել Նեպալի արևմտյան տարածաշրջանում՝ մայրաքաղաք Կատմանդուից 84 կիլոմետր հեռավորության վրա: Երկրաշարժի օջախը եղել է 15 կիլոմետր խորության վրա: Հիմնական երկրաշարժից հետո գրանցվել են 3,2-ից մինչև 6,9 մագնիտուդով շուրջ 90 հետցնցումներ: Նեպալի պաշտպանության նախարարության տեղեկատվության համաձայն՝ ավերվել է 191 հազար բնակելի շենք, վնասվել է ևս ավելի քան 175 հազար շինություն, հաղորդել է ՏԱՍՍ գործակալությունը: