Բարզանին հայտարարել է Իրաքյան Քուրդիստանի սպասվող անկախության մասին

Իրաքի քրդերի առաջնորդ Մասուդ Բարզանին չորեքշաբթի օրը Վաշինգտոնում հայտարարել է Իրաքյան Քուրդիստանի սպասվող անկախության մասին: Սպիտակ տունն այդ հարցը շրջանցել է՝ կոչ անելով Բարզանիին համագործակցել Իրաքի կենտրոնական կառավարության հետ, տեղեկացնում է ՌԻԱ Նովոստին:

«Չեմ կարող հաստատել, թե դա երբ կլինի, բայց Քուրդիստանի անկախությունը մոտենում է»,- հայտարարել է Բարզանին:

Նրա խոսքով՝ նախատեսվում է այդ հարցով հանրաքվե անցկացնել, «երբ կբարելավվի անվտանգության հետ կապված իրավիճակը, երբ կավարտվի «Իսլամական պետություն» խմբավորման դեմ պայքարը»:

ԱՄՆ փոխնախագահ Ջո Բայդենը, ով չորեքշաբթի օրը հանդիպել է Բարզանիի հետ, կոչ է արել նրան համագործակցել կենտրոնական իշխանությունների հետ՝ չհիշատակելով անկախության հնարավորությունը:

«Երկու ղեկավարները հաստատել են Իրաքի կառավարության, Քուրդիստանի շրջանային իշխանությունների և միջազգային կոալիցիայի միջև սերտ համագործակցության անհրաժեշտությունն ԻՊ-ի դեմ շարունակվող պայքարում, հատկապես՝ Մոսուլի ազատագրման գործում»,- հայտարարել է Սպիտակ տունը հանդիպման արդյունքում։