Իրանն ընդունելի է համարում բարել նավթի 70 – 75 դոլար գինը

Իրանի նավթի նախարար Բիջան Զանգանեն կարծում է, որ նավթի ընդունելի գինը մեկ բարելի դիմաց 70 – 75 դոլարի մակարդակն է: «Ոչ ոք գոհ չէ ընթացիկ գներից, անկայունությունից և ատանումներից: Ես կարծում եմ, որ բոլորն էլ շատ գոհ են բարելի դիմաց 70 – 75 դոլար մակարդակից»,- ասել է նախարարը, որի խոսքը մեջբերում է Bloomberg գործակալությունը, տեղեկացնում է «Արմենպրես»-ը:

Brent մակնիշի նավթը մայիսի 6-ի սակարկությունների ընթացքում հասել է այս տարվա նոր առավելագույն ցուցանիշին՝ բարձրանալով մեկ բարելի դիմաց մինչև 69,48 դոլար: Մայիսի 7-ին նավթի համաշխարհային գներն սկսել են նվազել:

Զանգանեն հիշեցրել է, որ Իրանը պատրաստ է 10 օրվա ընթացքում ավելացնել նավթի արտահանումն այն բանից հետո, երբ հանվեն երկրի դեմ սահմանված միջազգային տնտեսական պատժամիջոցները: Հետագայում հանույթը կարող է օրական մինչև 3,8 միլիոն բարել աճել վեց ամսվա ընթացքում և մինչև 4 միլիոն բարել՝ մեկ տարուց պակաս ժամանակամիջոցում: Ապրիլին երկրում օրական հանույթը կազմել է 2,78 միլիոն բարել, հաղորդել է ՌԻԱ Նովոստին: